The Chin Times hi na duhzawng a sile, in rak share sak vivo aw.

Chin Ramkulh Ah COVID-19 Natkai Rinhlelmi Dang Pakhat Um Bet

Chin ramkulh Tedim peng, Anlangh khua ah kum 60 hrawngih upa nupinu pakhat cu COVID-19 natnak nei ih rinhlel a si ruangah Tedim khawpi General hospital ah fianhrialten enkawl a si thu theih a si. COVID-19 natnak nei tiih rinhlelmi, tufang Tedim sizung ih tuamhlawm reromi hi kum 60 ih upa, nunau a si ih, US ihsin ra tlung, Tedim peng Anlangh khua ih khawsa a si, tiah theih a si.

Chin ramkulh Sipin  Vuanzi U Soe Htet cun “ṭuanvo neitupawl in felfaiten an enkawl hnu ah sizung lam ih kuat a si. Sizung ah ret a si ko nan, natnak a nei maw neilo timi cu Yangon, Mandalay, Naypyidaw lam lawngih ummi “nat check nak” ah felfai ten check ter hnu lawngah, nat a neih le neih lo a fiang ding. Tu hrih ahcun nat a neih le neih lo theihfel a si hrih lo, amah hi tufang ah damlo taksa a si ih midang thawn umtlang loin fianhrial deuh ih ret a si. A natnak Yangon, Mandalay, Naypydaw lam ih check fel asi hnu ah nat nei asile, amahte fianhrial ten ret ding a si” tiah a sim.

Atu vekin Chin ramkulh Tedim peng sungah Coronavirus natnak nei mi pakhat a um zo ih, tu ah rinhlelmi midang pakhat a rung pung bet cu, Tedim peng mipi pawl thinhar in an um rero a si tiah Mung No cun a sim.

Tedim khawpi ih um Mung No cun “tu ih rinhlelmi mi-na hi US ihsin a ra tlunnak cu a rei zet thlang. Ka theih dan ahcun malte a tak a sa, a khuh a khuh, a sungkua pawl cun Malaria a si an zum ih Malaria sii pawl tla an pe nan, damṭhat lam a pan thei dahlo ruangah Tedim sizungpi ah an mahte an ra piah-aw mi a si, amah hi kum 60 hrawng mi a si” tiah a sim. Rinhlel mi nupinu hi damlo bese zet cu a si lemlo tiah Mung No cun a sim bet.

Sipin vuanzi U Soe Htet cun “hi natnak lak ihsin kilhim-aw thei dingah ramkulh level in nasa ten zuam a si. Theihternak le ralrin peknak ca pawl khal tisuah a si, miburpi umkhawm lo ding khalin biaknak lam siseh tlawng lam khal khar thluh dingin rampi huap in theihter a si. Cui’ cozah thusuah vekin mipi lam khalin kan thlun cu a ṭul. Acozah thusuak pawl mipi lam in thulung zetin kan thlun asi ahcun natnak a karhzai vivo dingmi kan kham thei ding, asinan keimah ka thu si, ka duhdan in ka um ding tiih kan luhlul a si ahcun hi natnak lak ihsin kilhimawk dan a harsa zet ding, tiah a sim.

Tubaite ih US ihsin a ra tlungmi Tedim peng Kaptel khawmi COVID-19 natnak kai tiih rampi acozah in a phuanmi khal tu ah Tedim sizungpi ah enkawl rero lai a si. Thu laknak: Salai Khup Khup, Chin World.