The Chin Times hi na duhzawng a sile, in rak share sak vivo aw.

CNLD le NLD ih Danglamnak

NLD le CNLD danglamnak:
————————————
#NLD Party cu Kawl Miphun hruaitu pawl ih Policy tuah mi ah a ṭhum aw. Chin ram ih NLD thape tu pawl khal Daw Aungsan Suhkyi ah an ṭhumaw lala.

#Campaign Auhla khal ah Pi Suhkyi in Chin ram in duhdaw tuk ih Budget tampi in pe. Chin Cozah in Chin ram ih #Farthing kung khat hman hau theihnak thu kan nei lo. Cui ruangah Federal kan ṭul tuk. Federal khal Pi Suhkyi in -in pe thei ding. Cui ruangah NLD thapek a ṭul ti a si. Federal hi Pi Suhkyi bulpak thu ih pek theih mi cu a si lo.
#Campaign Auhla tluangtlam zet a si in ka thei. Himi ih lungawi tawk cun bawm ih thapek ding a si ko.

#Amah lawng te online ih Party thu ngannak ah NLD thape tu hnihkhat in hminlem ( Fake Account) hmang in le hminngai lang khal in bulpak relsiatnak le sawiselnak an ngan mi hmuh ding a tam zet. Himi hi thil pawi taktak a si. Democracy ah cun Party bangawk lo cun MP khal ah zuamawk ding a si ko. Zuamawknak ah cun nehtu um kel a si ih nehnak co tu lungawi pi thiam ih a co lo tu khal hnem thiam hi mi pitling lungput a si.

NLD Flag

#CNLD Party cu #Pathian leh #Chin Mipi ah an ṭhumaw ih Hotu pawl le Policy tuahtu khal Pathian zumtu an si.

#Campaign Auhla khal ah Pathian le Chin Mipi duhsaknak zar ih kan tlin a si le Chinram ṭhansohnak kan tuah ih tlunah 2008 Dan hrampi sung in Chin Miphun ih kan hloh zo mi pawl laksal theinak ding in nasa ten hna kan ṭuan ding ti a si.

#Federal thu khal ah Tlangpar Miphun pawl in nehnak kan co tam a si le Kawl Miphun in-in zah ding ih na sa ten kan nawr thei ding ti a si.

#CNLD Party thape tu pawl lak khal ah bulpak sawisel awknak ngan an um ve ih a ṭha lo zet. Himi lam hawizawng hi bansan rori a cu zo. Party tumtah mi le Chinram le Miphun hrang ih hna ṭuan tum mi aupi a tawk.

#Phunduh Chin Pacang ṭha Pu Dr. Za Hlei Thang in dampi lai ah khan an Inn ah ka va leng ih thu tintian kan ruah aw, kan reltlang. I sim mi pakhat ka cin ringring mi cu 1990 kum lai ih election hnu ah Daw Aungsan Suhkyi thawn kan tawngaw ih nan mai ram cu nan mai nan uk lawn,kan nih in zianghman kan lo theipi lo pi a ti ih Chin Party ih si MP ka tlin kha hmaizah zet in Cibai I buk ih i lungawi pi tin i sim rero.

CNLD Flag

#NLD ih si kan MP neihmi pawl khal hi Party dan hnuai ih um an si ih an duhduh an rel thei lo ti cu tui term ah zatei theih cio a si. Kan MP zahum zet Dr. Salai Riang Vel tla cun kan nih cu Pu le nei kan si -si. Kan duhduh in thu kan sim thei lo pi tin thinlung thiangten a sim hnge hnge.

#Democracy dan ih election a um ah cun Party tin MP zuamawk vutvo dan a si ih Miphun le khua le ram hrang ih hnattuan ding mi Aupi cio si ko.

#Vote neih thu ah Milian le rethei zonzai vote ,Pastor le Zuri sabah Vote khal a man a bangaw thluh. Unau suakkhat rori khal thapek duhmi Party a bangaw lo an tampi. Cui ruangah thinlung thianghlim ten Vote hawl cio in hlawh sawmaw cio uh si law.

#Thuphan thu theih fiang lo mi le umze nei lo zumhmang men sim le rel bansan cio uh sih.

Seherhnak thawn,

Kap Thio
Maryland,USA

Hi thu hi Kap Thio in a Facebook cahmai ih a thlahmi kan Post sawngmi a si.