The Chin Times hi na duhzawng a sile, in rak share sak vivo aw.

Donald Trump A Dinhmun A Tha, Joe Biden le A Fapa An Thang A Sia

Tu hrih ah hi cun mipi in “Merry Christmas” an ti thei a si. Biden tei’ sungkua cu sualralnak tuahtu sungkua (Criminal family) le eiruknak lakih thiar-fi-hlim aw theilo tiin a ṭhua.

International news & politics: CT Lalrinawma

Pastor Denise Goulet cun “Pathian in Donald Trump hi President ah a tling sal ding, tiah I sim” a ti. “Lock Her Up”, Thawngthlak uh tiin an au nasa.

Tufang kan leitlun thuthang ah ngaihven hlawhbik le mikip ih an thlir ringring mi, “US Politics” thuhla le “Battle for the White House” thuhla hi kan tarlang lehsal hnik pei. November 9 ih US rampi Election um dingmi ah State 50 sung ihsin State ziangmaw zat ah Postal ballot timi in VOTE million 24 lai a um zo ih, mitam sawn cun November 3 sun kherkher ah VOTE thlak an tum vethung. Tufang US ram dinhmun cu a sa hiamhiam a si bik ko.

Tuikum 2020 US rampi Election ah hin House of Representative, House member dingah mipum 435 hril an si dingih Senate tohkham 100 – 35 ah hrilawknak neih a si dingih, State 11 ah Governor an hril dingih, State Legislative Chamber hrang dingah tohkham 86 hril a si ding. Tufang ih Senate tohkham ah Republican 53, Democrat 53 le Independent 2 an um. House ah Democrat 232 an um ih, Republican hi 198 an si. Republican (Grand Old Party) GOP le Democrat pawl cun House le Senate tlun ih thu neitu si an cuh aw ih, Senate tohkham 35 lakah tohkham 18 cu theihfel an si hrih loih khuimi an caksawn pei timi theih harsaza zet a si.

Kum 2017 ah khan president Donald Trump hin Federal Judge hrang mi 200 lenglo a hril thei ih, cupawl cu US Supreme Court Justice a hril vek thotho in Senate ih lungkimpi le nemhnget ṭul thotho an si. House ah hin Republican, Conservative pawl cun “Born Alive Abortion Survivor Protection Act” cu House ah an ausuahpi ringring ih, Democrat, Liberal pawl cun an thu putluhmi cu an hnawlsak ringring. Cupawl ruangah hin tui ṭum US election hi cu a thupi hleice in ngaihven a hlawh hleicenak a si.

Trump le Biden An Kawmaw

Zarhte zan ah khan Donald Trump cun Carson City, Nevada Sate ah Campaign a nei ih, amah khingtu Democrat Joe Biden a ṭhua nasa ih Biden a tlin cun Carson khawpi hi ramṭhing le khawm ram vekin a reh khepkhep ding. Christmas a hung kim khalah Christmas hman ding nan nei nawn lo ding, Biden cun Christmas Nipi Ni sunglawi zet hi Cancel a duh men. “Merry Christmas” ti ai ah, “Great Season” (Tikcu Caan maksak) timi thawn thleng a tum. Kei cun cuvek cu ka duh ve lo. Tu hrih ah hi cun mipi in “Merry Christmas” an ti thei a si. Biden tei’ sungkua cu sualralnak tuahtu sungkua (Criminal family) le eiruknak lakih thiar-fi-hlim aw theilo tiin a ṭhua. Tubaite ah a fapa Hunter Biden ih Email ṭhenkhat ihsi an langdan ah Ukraine le China ihsin US$ million tel huilut in a sim. Campaign a tuahnak hmunpi ah cun John David Kahn ih sakmi “American Heart” timi hla cu an paly ih mipi in sah bawm in an thawmvang a ring nasa.

Nevada State hi an doawknak hmunpi “Battleground” a si ruangah, Trump le Biden caksawn si tum in an bei-aw nasa. Nevada State hi kum 2004 hnu lam cun Republican an cak thein awn lo. 2016 ah khan Hillary Clinton cu zatek 2.41% in a rak cak.

Mizansun, Nipisun ah kha cun zawi kawhhran timi bulta umlo International Church of Las Vegas ah Donald Trump cu ava khawm ve. Ava khawmnak ih Kawhhran member pawl cun an rak hmuak ṭha zet ih an Pastor Denise Goulet cun hmaitawn rorin Donald Trump cu zoh in “nazi 4:30 ah khan Pathian in ka hnen ah thu a sim. Na president cu vawi 2 ka tlinter ding a si” tiah I sim tiin Donald Trump hnen ah “President na si leh ding” tiin a sim. Pu Trump cu lunghmui zetin a hni zuamzo. Trump hi Nipisun khawm ngaina zet a sithu ruah aw phah in “Sunlawihawknak ropi tak a si” tiin A-hlu bawm ah US$ 20 a thla ve. Trump hi Florida State ih a um caan ah Golf Resort “Mar-a-Lago” kiangih um Church of Beltingdi By the Sea ah a khawm ve ṭheu ih, hi hmun ah hin Thawhsal Ni le Christmas khal a rak hmang dah zo.

Kantar, CMAG cun Trump hin Nipisun ih campaign tuahnak hrangah US$ million 12 a ngah ih Republican Donor Palmer Lucky ih paisa thawhmi a si. Beach Boys group pawlin zaihla thawn an awi. Joe Biden vethung cu thla 4 sungah US$ billion zikte lai a ngah.

Joe Biden khal Nipisun ah khan an umnak Delaware sate ah caan an hmang ih a nupi Jill thawn St. Joseph ah Catholic Mass an kil ve. Cu hnu ah North Carolina State ah campaign in a feh sal. North Carolina State hi kum 2008 hnu lam cun Democrat lam an cak ve dahlo. Barack Obama kha 2008 lai ah zatek 3.6% a rak cak ih, “battleground state” ve a si ih, 2016 ah khan Trump cun zatek 3% in Hillary Clinton a rak neh.

Biden cun Roman Catholic pawlin an ngaithupit zetmi le an ken ringring ṭheumi “Rosary” fa-te, Irish pawl cun “Prisoner’s Rosary” an timi Thawngtla pawl khalin thawnginn sungih an ken theimi ṭhi-kual-hlumte cu a kawrzal ah a pai ringring thu a sim ih, “Pathian hi i humhim ding lawngin ka dil dahlo. Pathian hnen ah cahnak I pe dingin le midang pawl an tuarnak sutkiang sak thei ka dil sawn a si” a ti. Catholic lakah amah duhlotu pawl cun “Mihrawkhrawl depde pa hi hril ci na si lo” tiin Bishop hrekkhat anti-Biden group dintu hman an um phah. Democratic party cun “Nau thlak (Abortion rights)” le “neih bangaw ṭhitumnak (same-sex marriage)” an pawmpi ruangah Biden hi Catholic si hmang sehla Catholic Bishop ṭhenkhat in an duhlo phahnak a si. Biden hi hriltlin asi ahcun John F. Kennedy siarlo ah US President ih Catholic pacang umsun a si ding.

Biden hi Durham, North Carolina state ih campaign a tuahnak ah mawṭaw 70 lenglo in an thlun ih tufang dinhmun ahcun Trump hnakin Biden in Poll ahcun a sang sawn ti a si.The New York Times, Siena College poll vek asile, Biden 46%, Trump 42% an si.

North Carolina state ah hin Trump hnakin Biden hi Poll ah dinhmun sang deuh nei vekin lang hman sehla, Biden Campaign Manager Jen O’Malley Dillon cun, Democrat donor pawl hnen ah “Naihthah huahhi ih um men ding ci a si hrih lo, Donald Trump hin nehnak co thei tuk dinhmun a si lai” tiah memo a ngan tiin AP News cun an tarlang. North Carolina ah hin kan dungzarh ah khan ballot 333,466 lenglo a tla zo.

Beau Biden and his father, Joe Biden, at the 2008 Democratic National Convention in Denver.

“LOCK HER UP! LOCK HER UP!” – Thawng thla Aw

Kum 2016 lai ih Presidential Election kha kan thlirsal asile, Hillary Clinton ih Email thuhla ah thuhla buai a tam zetih, US Secretary of State a rak ṭuan lai ih cozah thu pawimawh le thuthup pawl cu amai’ private server le Email hmangin a rak kuat suak ṭheu mi cu mawhthluk a hlawh zetih, Donald Trump an ṭhuat duhnak ruangah Hillary Clinton ih Email tam zet an rak hlawn sak. FBI tiangin an zingzawi ruangah cui’ thubuai cun Hillary Clinton ih dinhmun le boruak khal nasa zetin a tisiat phah, ti theih a si. Trump ih Campaign nak hmun ih mipi pungkhawm aw pawl cun Hillary cu kaih ih thawngthlak dingin “Lock Her Up” tiin an rak au nasa a si kha!. Tui’ṭum khalah Joe Biden ih fapa Hunter Biden, sii tama pa in a Pa Vice President a sinak cu suanlam ah hmangin Ukraine le China ihsin paisa million tel a rak hui lut thupawl Email ṭhenkhat cu The New York Post thuthangca cun October 14 ah khan an run pholang ta riai. Trump ih Campaign tuahnak hrekkhat ih mipi cun Biden le a fapa Hunter cu “Lock him up, lock them up”/thawng thla aw” tiin an rak au nasa.

Joe Biden le a fapa Hunter Biden tei’ fapa thuhla lawngah si loin, Michigan State Governor Gretchen Whitmer ih thuhla khalah Trump ṭantu mipi cun “Lock her up” thawng thla aw, tiin an rak au nasa.

Donald Trump hin Muskegon, Michigan State ih Campaign a tuahnak ah Michigan State Democrat Governor Gretchen Whitmer cu a ṭhua nasa ih, Trump rak ṭantu mipi cu an rak lungawi nasa. Tump cun “Governor Whitmer cun amah rukhloh an tumnak thuhla ah keimah lamlam mawh I puh. Covid19 a ṭhiṭha le felfai ih a do lo ruang sawn ah a si. American mipi pawl cu zalennak ngaina kan si vekin, khumbet (lockdown) kan duh lo. Tlawng pawl khal ong hlohli uh, tlawng pawl nan ong thlang ding si lo sawm? Tiin mipi a hun saithawt cu, mipi lam au-aw a ring duh nasa, Governor Whitmer hi “thawng thla aw” tiin an au nasa. A thusim lai hman peh sunzawm thei nawn loin amah Trump rori khalin “an zaten thawng thlak ding an si hi” tiin a hun ti ve. Tifel lohli uh, tiin a hun ṭawngsuak ih, cui’ ṭawngkam cu Democrat pawl cun an tuar a na ih, an mawhthluh nasa.

Governor Whitmer cun “Thil ṭihnung zet a si, keimai’ hrang lawng a si lo, kei le ka sungkua, American mipi pawl hrang ṭihnung um zetmi a si. Trump hin ramsungah sualral zetih cangvai dingih mipi a fawrh a si” tiin NBC “Meet the Press” ah a sim. House Speaker Nancy Pelosi cun ABC “This Week”, Nipi zing ih an kawmnak ah “Mai’ mawhphurh hman thei lo le ṭihnunnak hmangtu” tiin Donald Trump cu a sawisel nasa. Republican pawl cun Donald Trump an ṭan deuhdeuh sawn.

Trump Campaign Adviser lakih pakhat a simi Lara Trump cun CNN ih tawlrelmi “State of the Union” timi program ah, President Trump hin zianghman tisualmi a nei lo. Hi nunau hrangah ṭih ding a um lo. Trump hin hivek caan duh um zet le boruak zangkhai zet hi amah ṭantu mipi pawl thawn caan an hman ve menmi a si” a ti.

President Donald Trump cun Michigan state Governor Gretchen Whitmer hin Detroit khawpi le Michigan State ah khumbet (lockdown) thusuah a duh hlei ah, bulpak cangvaihnak pawl cu kham thluh a duh. Asinan American mipi mi zalen ram cun an theithiam lo ih, State pumpi ih khumbet (lockdown) an duhlo a si bik. Lockdown duhlo tupawl cu palik vekih thuamaw in an meithla ṭha taktak kengin Governor Whitmer ih office Lansing khawpi ih um Capital building cu luhcilh tum in an rak kulh dah. President Trump velvo in le Lockdown duhlotupawl lungkimpi zawngin Twitter lam ah Ca a rak thlah ve.

Governor Gretchen Whitmer cu Inn ah cawlh la ih a um lai ah, Michigan State mi Adam Fox le a rualpi minung 6 le “Wolverine Watchmen” ti awtu minung 7 pawl cun ruk hlo an tum tiin, FBI pawlin an kai. Federal Court ah cupawl ih thuhla cu buaipi rero lai a si. Wolverine Watchmen pawl cun Governor Whitmer ih thilti dan an dokalh ih lockdown an duh lo ruangah a policy thlengter an duhnak a si. Hivekih FBI le Federal Justice Dept., thil ti dan hi President Trump cun a kaihhruainak hnuai ih thil timi a si, tiin buainak suak loih hmeh-mit man a si cu a uanpi zet.

US National Police Officer’s Union pawl cun President Trump in “Law Enforcements” thiltimi a lungkimpi ruangah an pawlkawm thusuah cun “President dingah Trump an (endorse) nemhnget ti puangin thusuah an rak tuah. Cu laklai ah National Association of Black Law Enforcement Officer pawl vethung cun Trump rak ṭanpi ve mai cu an sawisel ve. AP News ih tarlang dan ahcun, National Fraternal Order of Police Officers pawl hi 350,000 an um tiin a rel ih, State 50 lakah Sate 44 ih Police Officer pawl cun Trump hi an VOTE ding, tiin a tarlang.

“SLEEPY JOE AI AH CORRUPT JOE OR COVER-UP JOE”

The New York Post thuthangca in Joe Biden le Democrat pawl “bomb sen” an run thlak ruangah American mipi pawl cun Covid19 nat-hri ruangih Trump Admin thil tidan mawhthluk lam hnakin Joe Biden le a fapa Hunter Biden ih thuhla le Email 26,000 lai cu mipi in theih cak emem in an ngaihven sawn tiah BBC cun a tarlang. Email mal laite lawng phosuah a si hrih lai nan, Biden tei’ sungkua hi eiruknak ih khat sungkua an si, thuthup pholang ding tampi um lai ding vekin an thei. Asinan hrekkhat vethung cun The New York Post ih thusuahmi cu thudiklo men ah ruat in, an zum tuk lemlo.

Breitbart News cun Hunter Biden in sum a rak dawnpi ṭheu Peter Schweizer in Hunter Biden cun a Pa vice president a sinak cu hmang tahrat ih a thil tidan pawl le a sumdawnnak thu pawl a ngannak Email 26,000 lai nei vekin a rel aw ih, Republican Lawmaker hrekkhat cun Federal Bureau of Investigation (FBI) zingzawi ter an duh.

British Politician lar zet, Nigel Farage, Brexit champion bawmtu lakih mi pakhat cun “Donald Trump hin Sleepy Joe ti ai ah, Corrupt Joe lole Cover up Joe tiin ko thlang sehla a ṭha ding. Twitter le Facebook lam hin eiruk thuhla nganmi cu an rak phitsak thluh ih a sual langlo dingin an rak hup sak” tiin Joe Biden cu a rak ṭhua ve nasa. Nigel Farage hi Brexit au suahpitu le Trump ih policy “America First” timi ngaisang zettu khal a si.

Hunter Biden in a Laptop MacBook Pro sungih Email a rak nganmi thuhla pawl cu Thuthanglatu pawlin Joe Biden cu a Campaign nakah thuhla an sutmi cu, Biden cun kut vai phah in zianghman a sanglet duh lo ih, a fehsan hai men. Thump cun Biden hi a fapa hnakin a eiru sawn. “Human Vacuum Cleaner” hnakin a rak eiru nasa sawn a si, White House ih um ding a tlak lo tiih a ṭhua nasa.

Hunter Biden ih Email hrekkhat ahcun China le Ukraine ram ih sumdawng milian zet thawn an biakawknak pawl a um ih, “The big guy” an timi ih hnen ah US$ billion tel Energy Gas thil thu ah “10 percent” tipawl an um ih, hi tawkih “the big guy” an timi hi Obama san lai ih Vice president rak ṭuantu Joe Biden rori hi a si tiin an sim. Trump cun Fox News hnen ah “Hunter Biden hin a pai’ dun a thlun a si bik, a khualtlawnnak ram ihsin $million tel a ngah a si. American mipi ih Siah pekmi dollar billion tel peksuaknak dingah hlawknak an rak ngah a si” a ti.

The New York Post hi kum 2007 lai ah khan Rupert Murdoch in a rak lei ih tuvekin Biden tei’ pafa hnih eiruknak thu an pholangmi hi mi hrekkhat cun an zum hnai lo. Cangantu Bruce Golding in a remkhawm cawp men a si tiin an puh. The New York Post cun 2017 hrawng ihsi khan Hunter Biden ih thuhla hi “Gossip” timi Catlang hnai ah Cahmai 6 lai an rak ngan ṭheu, tiah an sim. Hunter hin a mo, a unaupa ih thihsanmi ih nupi, a ngaizawn thu le a Nupi thawi an fa hi a fa a si ding a zumlo ruangah thubuai an rak neih thu pawl le Sii tama (drug addict) a si thupawl an rak ngan ṭheu tiin CNN cun a tarlang.

US Politics ah India an lut thuk zet. Kan nih Chin mipawl teh?

Joe Biden ih running mate le US Vice President hung si thut thei, Democrat lam ih Vice President candidate, Senator Kamala Harris hi a Nu cu Indian, Vai mi a si ih a pa cu Jamaican mi a si. US Politics ah hin Asian American, Hispanic – Latino-American, African American tipawl dinhmun sang zetzet an thleng. Cu rualrual in Asia ram ihsi vailut tu Vietnamese, Filipino, Cambodian le Chinese pawl khal dinhmun sang zetzet thleng an um. US ah hin Mizoram mi Mizo le Chin mi pawl hi thawngza-tel an um tiin rel a si ih, a lungawi um nasa. Cu rualrual in cupawl hrangah House le Senate member si ding cu a harsa deuh hrih lai. Asinan annih pawl cun an tlintawkte an thlenban cin, District Level, County Level le City Level ah hruaitu si ve dingih pum pekawknak le an hung lang ban ding a hngakhlap um ve nasa. CT Lalrinawma ih nganmi a si.

Video in na zoh duh asile, a hnuai ah na zoh thei;

The Chin Times / Chin Net