The Chin Times hi na duhzawng a sile, in rak share sak vivo aw.

Donald Trump le Joe Biden A Netabiknak Presidential Thucuhawknak Nei Ding

Trump Campaign Manager Bill Stephen cun “Thil thupi le pawimaw tuk relsuah dingmi a um ih, an thiltidan ah lungkimlo zet hman sehla, President Trump hi thucuhawknak ah a tel thotho ding” tiin a sim.

Commission on Presidential Debates ih khawkhannak vekin October 22 zanah Donald Trump le Joe Biden cu hmatawn rorin “Thucuhawknak” an nei sal ding a si. NBC News anchor Kristen Welker in tuiṭum ih Thucuhawknak a kaihruai dingih, minutes 90 sung an nei dingih thil thupi deuh relnak ah minutes 15 sung caan pek an si ding. Thusuhmi sannak caan minutes 2 sung veve lawng pek an si ding. Kan dungih Thucuhawknak an neihmi thawn danglam zetin, tuiṭum an Thucuhawknak ah hin, mi pakhat khat in thu a rel lai ah pakhat sawn in rak tibuai theilo dingin tuah an tum. Pakhat ih thusim lai pakhat sawn in a rak tibuai a sile, a hman mi Microphone off sak an si ding.

Hivek ih an thil tawlrelmi parah Trump Campaign Team pawl cun an lungkim lo zet. Asinan Trump Campaign Manager Bill Stephen cun “Thil thupi le pawimaw tuk relsuah dingmi a um ih, an thiltidan ah lungkimlo zet hman sehla, President Trump hi thucuhawknak ah a tel thotho ding” tiin a sim. An thucuhawk vei 2nak ding, Florida State, Miami ah October 15 ih neih dingmi kha Trump in Covid19 nat-hrik a ngah, a dam pekte lawng a si lai tiin Joe Biden ih Campaign Team pawl cun puhmawh an hawl ih hmatawn ih thucuhawknak neilo dingin (Virtual Debate), Hmatawn si lo, TV sawn ihsin Thucuhawknak nei dingih an thu tawlrel cu Trump Campaign Team lam cun “Biden an humhim duhnak le amah an ṭan ruangah a si” an ti ve ih an Thucuhawk ṭum 2nak ding cu rak cancel a si. Tuiṭum an thucuhawknak dngih an thupi ding cu, Covid19 donak, American sungkua sunglawinak, America ram ih cithlah thuhla, Climate Change, National Security le Leadership tipawl thupi dingah hril an si.

Trump Campaign Team pawl cun “Foreign Policy” telh dingin thu an bur nan, Commission on Presidential Debate lam cun um-e an rak ti lo. Trump Admin hin Covid19 donak an fehpi rero dan cu rel bikmi a si. Johns Hopkins University Data cun leitlun huap ah Covid19 nat-hrik kaitu mipum million 40 an kim zo, US ah mipum million 8.1, India ah mipum million 7.5, Brazil ah mipum million 5.2 an kim zo a si, tiah a sim. WHO lam cun leitlun pumhuap ih mipum 10 lakah pakhat in nei dingin an ṭuat ih, leitlun pumhuap mipum billion 7.8 lakah mipum million 780 lengloin Coronavirus an nei ding tiah an sim. Daily Mail cun US ram lawngah Covid19 ruangih thi mi 219,556 an si ih nat neitu mipum zaten 8,133,373 (8.1 million) an um tiin a ngan.

Donald Trump cun Epidemiologist thiam hminthang Dr. Anthony Fauci in an policy kalh zawngin ṭawngkam a rak ṭawngsuak ṭheu ruangah, “Dr. Fauci cu siatnak (disaster) a si ih thuhla a suahpi mi zaten American mipi a ti bangter in a tibuai a si. Hivek mai’ hrang lawng ruatih hmakhaw sial (idiot) pawl-hin in baangter thluh, a ti. Dr. Fauci hi CBS News “60 Minutes” timi ih an kawmnak ah, Trump Admin ih an hnaṭuan hrekkhat pawl a sawisel. Trump cun Covid19 Task Force ihsin a hnaṭuan a cawlhter thei thu a sim. Asinan I cawlhter ah cun bomb sen tum sawn (bigger bomb) a tuah thei a si timi ruangah, i cawlhter lo menmi a si tiin a sim.

Trump cun tui ṭum a netabik hrang an Thucuhawknak dingih Moderator ṭuantu ding, Kristen Welker cu “Hi nu khal hi mi diklo tak, Fake News reporter pawl thawn danglamlo an si. Asinan thucuhawknak ah hin ka tel a ṭul si lawm. Mipi cun Steve Scully ih thilti dan pawl khal an thei thluh ko, a ti. Debate vei 2nakih Moderator ding kha, C-SPAN ih hnaṭuantu Steve Scully a si. Asinan thusuhnak khrihkhan taktak pawl cu Trump dodaltu (Anti-Trump) pawl hnen ihsin a rak khawngkhawm si awm takin theih a si ih, leh hnu ah, Scully cu C-SPAN cun a hnaṭuan ihsin cawlhter. Tuiṭum ih Moderator ṭuantu ding Kristen Welker hi 2012 ah khan Democrat lam ṭangih hmin pe ṭheutu a si.

President Donald Trump hin Israel le Arab ram, United Arab Emirates le Qatar pawlin remdaihnak an tuahmi pawl le Foreign Policy ah thil tuah ṭhatmi tampi a nei. Asinan cupawl cu tuiṭum an thucuhawknak ah telh a si hmel lem lo.

Tlawngkai nikhat sun ah khan Sudan ram cun 1998 kum ih Kenya le Tanzania ram ih US Embassy bomb an rak puah ruangih mithi le hliamtuar pawl zangnadawmnak ah tiin US$ million 335 pe dingin thu suah an tuah. Himi hi Trump Admin hrangah lungawi um za zet a si. President Trump khalin “Thu lungawi um za tak a si, American mipipawl dik zetih thurel saknak le Sudan hrangah ṭhansonak karkap tumpi (Big step) a si. Sudan ram cu US cun State of Terrorism sponsor tu vekin Black list ih an rak ret mi cu ṭhiatbal sal a si ding, a ti.

US cun leitlun ih ram hrekkhat, mi firfiak pawl bawmtu tiih hrem le thliarhran mi an nei ih, Sudan ram khal cupawl lakah a rak telve a si. Asinan tu ahcun mi firfiak pawl bawmtu tiih an thliarhran le hremnak cu ṭhiatbal sal a si thlang ding a si cu. Iran, North Korea le Syria pawl cu a thliarhran in a hrem peh hrih ding. Sudan president Omar al-Bashir hi Islamist zet a si ih, a lal sung ah khan al-Qaida hotupa Osama bin Laden kha an ramah reilote a rak mikhual ih, al-Qaida pawl cun US Embassy, Dar es-Salam khawpi, Tanzania ram mi le Narobi khawpi, Kenya ram mi le USS Cole doawknak Lawngpi, Aden Sea tipithuanthum ih cawlmi cu kum 2000 ah khan a rak kap ciamco ih, mithi le hliam tuar tampi an rak um. USS Cole (Doawknak Lawngpi) khal a siat thluh. US Embassy ih hnaṭuantu pawlih Lukhawng man cu Sudan ram cun an President Omar al-Bashir an hlawnthlak hnu ah, cui’ lukhawng man pawl cu peksal dingin rem an timi a si. Sudan cun Israel thawi an karlak thubuai khal Trump Admin pawlih hnaṭuannak zarin, remdaihnak (diplomatic relation) tuah cing dingin an rel.

Sudan President Omar al-Bashir cu kum 2019 April thla ah khan a ralkap General Addel Farrah Burhan cun president sinak ihsin hlawn thla in, a kaih hruainak hnuai ih Sudanese PM Addellah Hamdok cun US cu ral vekih zoh loin, remdaihnak tuahpi an duh a si bik. Kum 27 sung lai US ih thliarhrannak le hremnak ruangah Sudan cu ram farah zetah a can phah. Leiba US$ billion 60 an nei ih, an paisa in man neihnak tla niam sinsin in, thil man a khung, inflation rate a kai fawn, tubaite ah 212.29% rori a kai bet. President Omar al-Bashir hi Iran thawn kungkaihnak nei in, Iran cun Gaza Strip ih Palestinian mi firfiak pawlih ralthuam thawn, Sudan ram ihsin a rak bawm ṭheu tiah puh a si. Sudan ram cu “pipeline” vekih um in, mi firfiak pawl khawsaknak hmunbik tiih puhmi a si. Omar al-Bashir hi UN War Crime Tribunal cun a lal sungih a thil tisualmi pawl ruangah thubuai an tuahsak a zum um.

Donald Trump hi sawiseltu le dokalhtu an tam vekin, faktu le ṭanpitu tampi an rak um ve thotho. Hollywood star hminthang Kim Kardashan, kum 39) cu anti-Trump a simi David Letterman cun Netflix Show ih an kawmnak ah, Trump relse ding zawngin, a siatnak le ṭhatlonak pawl relsuak ding hawlih thusuhnak a tuah hrimnak pawl cu, Kim cun rel ding zianghman a theih lo thu mitthli tla phah in a sim. Kim Kardashian cun President Trump ih Criminal Justice System/Prison Reform thu cu a lungkimpi zetih, 2018 ah khan White House rori ah Trump tei’ sungkua thawn caan an rak hmang dah. Democrat le anti-Trump pawl cun Trump na dinpi ih na ṭan ringring asi ahcun na mithmai a bal ding, zohman ih uar na hlawh nawn lo ding tiin an rak sim ṭheu thu a rel. Trump in Presidential Power hmangin damsung thawngtla dingih thawng an rak thlakmi, Alice Johnson a rak suah zalen cu fak le lawm a hlawh zet. Thufim pakhat ahcun “Nangmah kha nangmah rori singam aw” a ti.

Video in na zoh duh asile, a hnuai ah rak zoh aw;

The Chin Times / Chin Net