The Chin Times hi na duhzawng a sile, in rak share sak vivo aw.

Kawlram mi Singapore ih Hnen-um in A Nau Um Laimi Cu Beel Sa Sungah a Kut Hnim-Kang sak; VIDEO

A Naute ummi ih kut Tisa ah hnim sak

SINGAPORE (The Straits Times): Kawlram mi Singapore ih hnen-um hnaṭuantu kum 30 mi, nunau cu a naute um lai mi, thla 16 mi, cu rawl suannak beel sa sungih a kut a hnim-kang ter ruangah ṭuanvo neitu palik pawl cun an kai tiah theih a si. Kawlram mi hnen-um nu hi January 15 sun ah khan amai’ umnak, Block 992B Buangkok Link ah an kai.

Hi thilcan dan pawl cu, January 21 sun ah khan Facebook hmangtu, kum 40 ih upa Amy Low timi in an inn sungih retmi CCTV video record cu social online parah a pholang ih, cui’ Video sung ah cun an hnen-um nu (Kawlram mi) cun an naute, thla 16 ih upa cu a kut kehlam, rawl suannak beel sa sungah a hnim sak (a hrolh sak) lai hmuh theih in a lang ih naute ṭaprak aw khal theih a theih. (original video lawngah naute ṭaprak aw theih a theih).

A Naute ummi ih kut Tisa ah hnim sak

Cui’ Video cu online ih a upload nak nazi kar reilote sungah, viewers 218,000 lai an kim man. Facebook account neitu Low cun hi thil a can ni hi January 14 sun ah a si tiah a sim. A reldan vek asile, fanu upa deuh kum 8 mi a nei. “Hi video ka vun zoh cu, ka taksa pumpi in ka hnin thluh, ka khur durdo” tiah a sim.

“Hi thil a can ni ihsin tuisun ni tiang ka fanute hi zan tin, zanvar deuh thaw in, cawl loin a ṭap ringring. Naute a si vekin, aw-kam thawn biak theih a si fawn lo, a naa zet lai maw, a zia deuh maw tivekih sut theih le a si fawn lo” tiah naute Nu cun an harsat thu a sim.

Naute Nu cun, an hnen-um nu hi Myanmar mi a si thu, kan dung kum December 7 ihsin an hnen-um hnaṭuantu a si thu a sim. Naute kut beel sungih a hnim lai Video rak zoh ve aw;

Naute nu (inntek nu) cun a Facebook ih a simdan vek asile, Kawlram hnen-um nu cun hi thil cangmi hi tipang thil a si tiah thuphan a sim nan, Video an zohsal ih, ṭhaten an zawihnik tikah, hnen-um nu hin an khua le ram ngai tukih tlun duh ruangah, tlun thei dan ding lamzin hawl in, naute hi rawl suannak beel sa sungih a kut hnimsak ih a tinat nak san a si, tiah amah lala a phuangaw sal, tiah a ngan.