The Chin Times hi na duhzawng a sile, in rak share sak vivo aw.

Kum 2020 Falam Run Inn Tlun Puaipi Ah Benjamin Sum Tel Sal Lo Ding

Kan rak hngakhlap zetmi, March 27 – 29, 2020 ih tuah dingmi, avei hnihnak Falam Run Inn Kum Puaipi cu tufang kan leitlunpi ih buaipi bikmi le mikip ih ṭihphan bikmi Coronavirus ruangah 2020 kun sungah tuah nawn lo dingin ṭuanvo neitu lam in thubawhcatnak an nei tiah thuthang a um.

Hi thuthang thawn pehpar in, Falam tualsung thuthang Chinland Herald Thuthang Ca cun Run Inn Tlun Kum puaipi cangsuak committee a simi GCO hotu Pu Thawm Mang ih ṭawngmi cu hitin an ngan “Ramleng phunsang tlawngta pawl an tlun ding duhsaknak thawn an tlawngpit can a simi November lole December bat in tuah thei sehla kan ti nan, November ah rampi hrilawknak a um ding tikah a remcang thiam lo ih hmai kum lawlaw ah siseh tiin kan relcat, tiah a sim” tiin an ngan.

Cun hi Run Inn Tlun Kum Puaipi cu March 27-29, 2021 ih ṭhawn dingin an relcat thu Pu Thawm Mang in a sim thu khal CH in a tarlang cih a si. Curuangah Falam Run Inn Tlun Kum avei hnihnak Puaipi cu March 27-29, 2020 ah si loin, hmai kum, March 27-29, 2021 ah ṭhawn a si zo tinak a si cu.

Run Inn Tlun Kum Avei hnihnak Puaipi hrangih Hlasak dingah Benjamin Sum khal sawm a si ih a telpi ding thu khal theih a si. Asinan ruahbanlo pin tui kum sungah tuah theisallo dingin thuhla a um ruangah Benjamin Sum khal tuikum, 2020, ih tuah dingmi Falam Run Inn Tlun Kum puaipi ah a tel thei ve lo ding tinak a si.

Run Inn Tlun Kum ih Hlasaktu ding pawl

Run Inn Tlun Kum avei hnihnak Puaipi ih hlasaktu dingih sawmmi pawl cu Salai Tawna, Salai Ṭuan Ling Thang, Solomon Menrihai, BJ, Israel VSL, JH Thang, Dika, Fred, Laldinthari, John Thanga, Benjamin Sum le Mercy pawl an si.

Leitlun pianphung ih a rak kentelmi boruak cakkhai ruangah Run Inn Tlun Kum Avei Hnihnak puaipi bikhiah ni, thla le kum ah tuah theilo in a um cu a pawi ngaingai a si. Mipi lam khalin pawi an ti zet. Hmai kum, 2021, sawn ah, Pathian in damnak in pek asile, hlunghlai takin tuahsuak thei dingin ṭangtlang in kan zuam sawn kei uh. Thlacamnak thawn…

Run Inn Tlun Kum Thu Video ih zoh duh hrang;

The Chin Times