The Chin Times hi na duhzawng a sile, in rak share sak vivo aw.

Lal Tan Pui that tu kaih ngah a si zo

Lairawn Myangsone ihsin peng 3 hrawng ih hla Lo thlam ih riak Salai Lal Tan Pui, kum 23, nam thawn sat thattu cu February 2 sun ah Kalaymyo Palik pawlin an kaih ngah zo thu theih a si. Salai Lal Tan Pui nam thawn sat thattu, tualthattu hi Kalaymyo pengih Ṭhuma khawmi U Phoe Tan (ဦးဖိုးသန်း) a si ih, San Tah khua (စံသာကျေးရွာ) mi nupi a nei ih a nupi tei’ khua ah ummi an si tiah theih a si.

Lal Tan Pui

Tualthat tu, Phoe Tan, an kaih dan thawn pehpar in, Myangsone khawbawi Pu Ral Lian Mang cun, thah a tawngtu Lal Tan Pui cu tuihlan ah a Nui hnen ah, amah thattu pa hin a Nupi thawn an rak be-aw dah ih a thik thu a rak sim dah. Cutin a Nu cun a fapa Lal Tan Pui ih thihnak thawn pehpar in lunghrinnak nei in Palik hnen ah a report ih cutin tuvekin tualthattu an kaihngahnak a si, tiah a sim.

A tir lam ah kha cun ka that lo tiah a phat nan, leh hnu ah amah le mah a phuangaw sal tiah an sim. A thah dan thuhla palik pawl in an sutih a sim cu, Phoe Tan hin tlangval Lal Tan Pui a thah hlan ah thukam an el-awk thu a sim, tuihlan khalah thukam an rak el-awk dah thu khal a sim. Cutin Lal Tan Pui ih riaknak Lo thlam ihsin furlong 3 hrawngih an sungkhat tei’ Lo thlam ah Lal Tan Pui that dingin a rak riak thup thu, amah lala in a phuang suak.

Tualthattu: ဖိုးသန်း

Tlangval Lal Tan Pui thah a si dan cu, Lal Tan Pui le a Nu, Pi Tlem Cin cu an Lo ah Nicia, Mipe, Purun pawl an ciing ih cutin zanriak in Lo hna an ṭuan ṭheu. January 19 zan kha Pi Tlem Cun cu inn ah a riak ih a fapa Lal Tan Pui lawng Lo thlam ahcun a riak. Cutin a thaizing, January 20 ah a Nu cu Lo ava feh ih an thlam ava thleng cu a fapa hmu nawn loin thisen tampi sawn a va hmu ih, a lungphang in, furlong 5 hrawngih hla an Lo venghnen mipa pakhat cu sawm in an Thlam kiangkap an hawl ih a fapa Lal Tan Pui cu thicia in a ruak an sar.

Lal Tan Pui hi a kut kehlam zunghnih a hloh ih a mit le a Lu pawl ah hliam nasa tak hmun 6 rori tuar ih thi a si. Thu laknak: Zalen