The Chin Times hi na duhzawng a sile, in rak share sak vivo aw.

Lawng-ka-sa Leknak Daan Ramkom Tlangsuak In Nemhnget

Ramdang mi an ra lut ih a lek theinak dingah Casino leknak pawl rampi theihpinak thawn on mi leknak (​ေလာင္​းကစား) daan (law) cu tuini March 8 ih tuahmi ramkom tlangsuak ah nemhngetnak an nei tiah theih a si.

Daan vekin 1986 ih rak tuahmi leknak daan cu hlon tahratin leknak inn pawl cu ramkom acozah lungkimnak thawn lawng in on ding a si thu an sim.

Ramkom tlangsuak daan tuahtu committee sungțuan Dr. Myat Ngian Soe in “kanmah rammi pawl cu lek sian a si lo lawlaw, atu an on mi Casino pawl khal register an tuah ih siah pek dingah daan vekin kan fehpi ding” tiah a sim.

Cuihleiah leknak hmun pawl report tu cu rampi sumpai ah a laksakmi sungin zatek 10 laksawng pe dingin lea kaitu cu zatek 20 laksawng pek dingin daan tuahmi sungah an telh thu theih a si.

Daan nemhngatmi nung dingin rampi president ih theihpinak hmin khen ding lawng a tang ih Casino thawn pehparin daan cipciar suah theinak khal ramkom acozah ih lungkimnak vekin tuahsuak thluh ding a si tiah a sim.

Mingalardone peng senpi tlangsuak palai U Aung Hlaing Win in “rampi hrangah siah ngah betnak a siih zamrangten tuahsuak lohli a duh um, Titoih puai hlan ahhin daan pakhat ih a nun ding ka ruahsan” tiah simnak a nei.

1986 ih leknak daan ahcun Casino pawl hi theihpimi an si lo khalle Kawtawng peng le Maywaddy peng ahcun Casino pawl ong in hnațuan a theih ti’n a um thu theih a si.

Kawtawng peng sung Island pawl ih hotel pawl thawn pehparin theihpinak a um lo thu, siah fangkhat hman khon a si lo thu Thaninthari ramțhen acozah in 2018 January 31 ih tuahmi ramțhen tlangsuak tonkhawmnak ah a rak sim dah zo.

Thaninthari peng vote hril pahnihnak ramțhen tlangsuak palai U Ye Myint Shwe in “tuihlan ah theihpinak a um lo mi pawl cu bal dingin tlangsuak tonkhawmnak ah a thehluhnak kumkhat a rei zo na’n atu tiang an ong lai thotho, theihpinak um lo khal control ding a harsa ih atu vekin theihpinak daan tuah hi a țha sawn, rampi khal siah a ngah bet ding, asina’n siah a ngahmi sumpai hi khuitawk hrangah a hmang suak timi cu theihternak țhazet a tuah cu a țul” tiah a sim.

Myawaddy peng senpi tlangsuak palai ih sim dan vek asile Thailand – Myanmar ramri Myawaddy peng sungah Casino leknak hmun 8 a um thu theih asina’n register nei in rampi ah siah a pe timi simfiangnak a um lo.

Karen ramri kiltu ralkap (BGF) le China milian pawl telin Myanmar Yatai International Group ih sakmi Shwe Kokko innpi project hi Casino ah a tel ding thu Asia Time in a tarlang ko na’n hi project hi atu hrih ahcun minung umnak lawng ah sian a si hrih tiah Myanmar sumhram committee lam in an sim.

Pyin Oo Lwin khawpi kiangih sak dingmi Cyber City project khal Casino ah telh in saknak pe dingah ramkom acozah hnenah an thehlut thu Mandalay ramțhen khawpi le inn țhansonak tawlrelnak zung ih țuanvo neitu pakhat in a sim.

Casino pawl siannak thuhla ah hmaisabik thusuttu U Aung Hlaing Win in Casino hi khualtlawng țhansonak le rampi siah ngahnak ah tampi a bawm thei dingih daan tuahmi zamrangten nungter in himi thawn a pehparmi tlangbawi zung pawlin a rang theibik in țuansuak dingah a forhfial.

Macao le Singapore hi Casino ihsin kumtinten dollar thawngtel siah an ngahmi hi thlir in a sim ih kan ramri Lao le Vetnam khal Casino hi theihpinak thawn ong tahratin sumpai an hawl thu U Aung Hlaing Win in a sim. Ref: IWD