The Chin Times hi na duhzawng a sile, in rak share sak vivo aw.

Malaysia UNCHR in mithar a la ngaingai maw?

Tui zing, November 28, 2019 ah Myanmar ram ihsi raltlan mipi tamzet cu UNHCR in mithar a la ding tiah ruatin UNHCR office hmai ah an pungkhawm ciamco. Tui zing, zinglam nazi 1AM ah UNHCR office hmai an khat ṭheh zo tiah thuhla theih a si. UNHCR in mithar a la ding timi hi Community pawl in siseh anmah UNCHR officer lala hman in thuhla an theihlomi a si ih, mipi in khui lam thu an rak thei timi cu khawruah harza a si.

Thu umdan cu, Mizansun, November 27, 2019, ah khan Kachin mi minung 80 hrawng cu hringhrim in appointment khal um cuanglo in UNCHR ah an feh ih UNHCR ṭuanvo neitu lam in an zate hnen ah, tui hnu lam thla 10 hrawng ah kawh ding nan sile, kan lo ko leh ding anti ih Cahnah fate (appointment cahnah ngaingai si lo) an pe ih cutin an tlunter.

Mizansun lam ih minung 80 pawl kan lo ko leh tla a si thei, tiih Cahnah fate an rak pekmi thu cu hmun kip ah a darh vivo ih “mi ih thusim sawng le Ar hma cuk” an ti bangin midang dang in an rak theihsawng vivo tikah UN in mithar a la anti ih cutin minung hi zat UNHCR hmai ih hung tlar-aw an si.

UNHCR in mithar a la siloin mipi lamsawn in an mahte palung in UNHCR in mithar a la tiih an hung panmi a si. UNHCR in a thup a thli in mithar a la dahlo, community pawl hnen ah a simthan ṭheu.

Mithar lak ding thu thawn pehpar ahcun UNHCR hin ziangti lam khalin Community pawl pehtlai lole simthei loin a um lo ding. Ziangah tile, Malaysia ih ummi raltlan pawl cu mah le community nei cio an si tikah UNHCR khal ralring zetin hna an ṭuan ve.

Curuangah tui zing ih thuhla thar UNHCR in mithar a la timi cu UNHCR in official ih thusuah a tuahmi a si loih mipi lam sawn in mizansun lam ih minung 80 cahnah fate an pek ruangah in pe ve menthei timi ruahsannak thawn feh an si sawn, miṭhen cu thuhla theilo bepbep tawngpa feh ih fehve men an si.