The Chin Times hi na duhzawng a sile, in rak share sak vivo aw.

Mayweather in Manny Pacquiao Thawn Thongawksal Dan Ding Tawlrel

Floyd Mayweather cun China lam ih thong awk nak ding lam cu ruat thei loin Manny Pacquiao thawi’ thong awk dan ding lawng lawng a hawl siin an rel.

Boxing legend, Floyd Mayweather hin 2017 kum khan UFC suan tawlawl, an Star tak Conor McGregor cu boxing ring sungah a neh ih, paisa tam nawn a la. Cui hnu cu boxing lam hi a ti nawn lem lo. Boxing a cawlhsan thu a phuang. Asinan, kum hlun thlah ni ah khan Tokyo khawpi ah boxing ring sung a lut la la ih, Japanese kickboxer Tenshin Nasukawa thawn an thong aw. Hi ṭumah hin Mayweather cun awl tukin nehnak a co ih, £7 million a hlawh.

England ram thuthang ca lar tak in a rel dan cun tu naiah Mayweather hin Tuluk ram ih exhibition match neih theinak chance a neih thu le, cui a chance cu Mayweather hin a êl siin a ngan. Neh loh zo hman nei dah lo, boxer ropi tak Mayweather hin ziangah so hi ti maiih Tuluk ram feh a hrial? Manny Pacquiao thong sal dan ding a tawlrel siin thuthang ca hin a ngan.

Hong Kong khawlipi ih hram bun DEF Promotions ih an director director Jay Lau cun, “Floyd Mayweather hi Hong Kong khawpi ah vei hnih a ra zo ih, ka fapa Jayson thawn an be aw. Keimah rori thawn kha kan be aw ko. Tuluk ram ih exhibition match thuhla pawl kan rel pi,” a ti.

“Japan ram ih Tenshin thawi an thong awk vek deuh kha China ramih hun ti ve kan duh thu kan rel pi. Kan biakawknak a tluang vivo ding hmang kan ti laiah a thinlung muril thu a hun phorh. Manny Pacquiao cu a thinlungah a tum bik ring ring lai. Pacman thuhla kan rel hnu cun kan biakawknak kha a tawp rori,” a ti.

2015 kumah khan Mayweather le Pacquiao tei pahnih hi an rak thong aw zo ih, Floyd hi point in a cak. Tu naiah thawm vang ziang ziang simaw a hung thang la la ih, an pahnih hi thong aw sal ding vekin an rel. Pacman le bang cun thongawk sal a hiar nak hi a rei tuk zo.

Floyd Mayweather vs Manny Pacquiao