The Chin Times hi na duhzawng a sile, in rak share sak vivo aw.

Mi Thuphan Puh in Party Leemsawm Ding A Si Lo

Hrilawk zik a siih mi in an ning pang ding tiah ramkhel thu le party thu cu ngan ka tum nawn lo nan party leemsawmnak ah 16.9.2020 zaan,

Mi Thuphan Puh in Party Leemsawm Ding A Si Lo – Pu No Sum

1. Hrilawk zik a siih mi in an ning pang ding tiah ramkhel thu le party thu cu ngan ka tum nawn lo nan party leemsawmnak ah 16.9.2020 zaan, Sunthla khua ah bulpak hmin saal in thuphan puh ta hrat in CM Salai Lian Luai in leemsawmnak a nei ti ka theih ruangah mipi in thudik, thuhman an theih a ṭul tiah himi ca ka run ngan saalnak a si.

2. Leemsawmnak ih a simmi cu “Falam khuapi karh ih hmanmi nan ram cu kanmah NLD cozah ih lo laak sakmi a si lo, USDP san lai ah CM Pu Hung Ngai in culai ih AD Pu No Sum a sut ih lungkim lo le dokalh tu kan um lo a ti” timi cu thuphan a si. Relkhawmnak cakhum (meeting record) khal a um lo. CM Pu Hung Ngai cu 2013 kum sungah Falam ah voi 2 a ra ih khuapi karh thu rel a um lo, meeting record khal a um lo. Curuangah “USDP san ah CM Pu Hung Ngai le Pu No Sum ih rak tuahmi a si” a si a timi cu thuphan rori a si. Thuphan ih leemsawm cu “bum leem” a si. NLD party ih fehpi le hnaṭuan dan khal a si ding ka zum lo. Bulpak cang dan a si, a pacang hna lo tuk aw. Sunthla unau pawl tla in thungai ah an ruat pang pei.

3. Kan Falam khuapi karh thu ka hmuh hmaisabik cu 26.11.2012, Myone-A-htwe-htew-uk-chuk-zi-htanah cahmai 3/ 101/ in DC hnen ih cakuatmi ah Lungpi veng thar “A-hmuh-ṭuai-a-hmat (1/2012) ṭin-piah-chin” ti a siih a pahnihnak cu Oct 16, 2014 ih tuahmi Falam khuapi thar (Lungpi) “Myotit-Siman-king (Town plan) timi meeting record a si. In theihpi dingah hih ni hi pension ka laak hnu thla 6 a rei hnu ih an tuahmi a si. Kei cu inn leeng suak thei nawn lomi ka si. Cutawk khal ah hnemhngetnak a um lo.

4. A pathumnak ka lo theihter duhmi cu 18.5.2015 ni ih leiram zungbawi Pu Leeng Kip Zul ih Falam khawpi thar (Lungpi) thuhla thawn pehpar ih cauk a si. Hih cauk sungah leiram an laakmi rampi pawl le a hmin pawl, a fiak/a kauhnak pawl kim ten a tel ṭheh. Asinan mangbang dingmi cu Nov. 9, 2017 ih Pye-Hte-Yee ih thusuak ca ahcun cui’ ramri le ram hmin pawl a tel nawn lo. Falam thuanthu siar duh le ret duh nan um a si le ka hnen ah nan ra zoh thei. Hih cauk an ngan khal hi pension ka laak ih kum khat hnu ih nganmi a si.

5. A tlunlam ih thuphan puh awk thu hi atu lawng a si lo. Falam senpi inn ih mipi hmai khalah a rak sim dah ih thuphan a sit hu tlunlam upa, President hnen tiang ca ka rak ngan dah zo. A dai zo hmang ka tiih atu ah VOTE hawlnak ah a tharthawh saal.

6. Leiram laaknak thusuahmi ca 1465/2017 cu Nov. 9, 2017 ah suahmi a siih culai ah NLD siar lo, Adang COZAH teh an um maw? Mai’ tuahmi rori midang puh rero hnakin ka ṭuan lai ah Falam khuapi karh ka tuah ti sawn sehla thuanthu a mawi sawn ding.

A tlun ih thuhla hi CM in a ṭong ngai pei maw tiin ka ruah lai ah Sep 17, 2020 zaan ah pacang pahnih in rung leeng ih hih thu in rung sim. CM in hitin a ṭong ngaingai maw ka ti tikah, ṭong ngaingai e, cuhman ah 2012 kum ah a ti. Atu khal ah khua lam pawl hei phone sehla zapi thei in kan ngai thei mai ding inti nan, cu rero ṭul hlah ee ka tiih 2012 kum December 22 lawngah Falam ka thlengih ka thlen kum cu zianghman ka ṭuan man ual lo ka ti sapbei.

Chinland Herald Daily News

Hminsin: A tlun ih thu hi Falam Tualsung Media “Chinland Herald Daily News” ih tisuahmi Pu No Sum ih simmi a si.