The Chin Times hi na duhzawng a sile, in rak share sak vivo aw.

Myanmar Rampi Acozah Tuahdan Ding le Election Thu

Ralkap cun President an ṭuan a zumum lem lo. An ṭuan pang ahcun NLD kan mawhthluk ding. A san cun mi huikhawm loih hngal takih an um ruangah a si ding.

1. Election: November 8, 2010 ah Hluttaw Palai Hril a si ding. Amyota Hluttaw 168, Pyituh Hluttaw 330 le Ramkulh/Ramṭhen Hlutaw 660, a zate kawmin 1158 hril an si ding. Ralkap ihsin ṭhen li ih ṭhen khat an rat ruangah Amyota Hluttaw 56, Pyituh Hluttaw 110 le Ramkulh/Ramṭhen Hluttaw 165 cu ralkap an si ding. Pyidaungsuh Hluttaw kan timi cu Amyota Hluttaw le Pyituh Hluttaw kawmaw an si ih 664 an um. Amyota Hluttaw Speaker(hotu) in kum hnih le a hrek, Pyituh Hluttaw Speaker in kum hnih le a hrek Pyidaungsuh Hluttaw Speaker an ṭuan ding. Pyituh Hluttaw Speaker hi Vive President sangtu a si ih Amyota Hluttaw Speaker in a thlun. An thla hlawh cu Ks. ting 35 a si.

2. Hluttaw Kawh: 2021 February thla tir ah hrilawknakih tling mipawl cu Hluttaw kai dingin kawh an si ding. Myanmar ih thuneihnak sangbik cu Hluttaw a si. Cun Hluttaw hi Democracy hrampi ih ruah a si. Hluttaw a um lo cun democray a um thei lo. Hluttaw kotu ding cu Speaker hlun pawl an si ding. Cule Speaker tharpawl le Hluttaw sungih Committee pawl an hril ding. Hluttaw Palai pawl hlawh hi ting 10 a si Hluttaw an kai sung nitin TA 20000 an ngah bet.

3. President Hril le Thuneihnak Pek: 2021 March thla thar ah President hril an thawk ṭheu. Pyituh Hluttaw le Amyota Hluttaw sungah Candidate ding Party tum deuhpawlin milai an suah hmaisa ih hrilnak an nei hmaisa. Cutin Candidate pathum: Amyota Hluttaw ihsin pakhat, Pyituh Hluttaw ihsin pakhat, Ralkap ihsin pakhat an ra ding. Cupawl cu Pyidaungsuh Hluttaw Palai 664 in an hril ding. Hitawk ah Palai 333 vote neih le tisiat theih loin an tling ding. Asinan mi 3 in vote an zemawk ding ruangah 333 teng teng lo, 300 kiangkap khalin President a vote tlin theih a si. 2016 President hrilnak ah U Htin Kyaw(NLD-Pyituh Hluttaw) -360, U Myint Swe(Ralkap Cand)- 213, U Henry Van Ṭhio(NLD-Amyota Hluttaw)- 79 tiin an ngah a si.

President hi March 20 kiangkap hrawngah an hril ṭheu. Cutin President in Union Minister, Eclection Commission, Tribunal Committee, Ramulh/Ramṭhen Chief Minister le a ruat ding mi pawl a ruat ih Hluttaw in an nemhngeh hnu ah March 31 ah thuneihnak an hlanaw ding. April 1 ihsin acozah tharin ṭuanvo an la ding.

4. Ramkulh/Ramṭhen Acozah: President in CM ding a ruat duh mi cu State/Region Hluttaw ah an hmin a thehlut ding. An tlinlonak an phawrhsuah thei lo cun Hluttaw in an hnawng thei lo. Ramdangah cun Advise and Consent an ti tikah an hnawng thei nan kan ramah cun hnawn ngai a um lo. Hluttaw in CM a pawmpi hnu ah State/Region Minister ding a duh mipawl cu CM in President hnenah a thehlut dingih a nih in a ruat(appoint) hai ding.

5. A Cang Thei Mi Acozah Thar: Myanmar President hrilawk dan cu Pyituh Hluttaw, Amyota Hluttaw le Ralkap in Cadidate pakhat ciar suah ding an si. 2015 ah cun NLD in Pyidaungsuh Hluttaw ihsin 57% (Palai 390)hrawng Palai an nei nan 2020 ah cun 38 %(Palai 250) hrawng lawng an si thlang dingah ruat sehla. Lam ṭang an hawl thiam lo ahcun Candidate hman an co lo thei. Tlangmi party thawn an biak remawk lo lephei cun USDP in Candidate an co thei. A san cu Pyituh Hluttaw le Amyota Hluttaw pawlah 50+ teng teng a ṭul lo. Candidate 3/4 an um pang cun zumlopi in a mal deuh sawn khalin Candidate a co thei ding. A cang thei mi Acozah pianhmang:

(a). NLD Hoha Mi Acozah: Hitivekin hrilawknak rizal suak sehla NLD hin acozah tuah ding cun Palai 333 ṭul mi lakah 250 hrawng lawng a ngah ding ruangah Palai 83 hrawng a mamawh ding. Ralkap le USDP cun an bawm lem lo ding. UBP le 88 PP hi cun an bawm thei men nan Palai 30 hrawng lawng an neih ding ruangah Palai 50 hrawng an mamawh lai ding. Tlangmi party nepnawi khalin an bawm thei nan acozah tuahnak khawp neih cu a har deuh ding. Hinah Tlangmi Party-pawl hnget takih an ṭantlan a ṭul ding. Kawl party tumpawl hin an hlawknak dingah cun Tlangmi party sawh kek cu pawi an ti lo ti 2016 ah a lang zo. ANP party rawn loin U Aye Thar Aung cu Deputy Speaker dinhmun an pek tikah ANP an kuai phah a si khah. U Aye Thar Aung dang an suah lonak dingah Tlangmi Party pawl an timlamawk cia a ṭul ding.

(b). NLD le Tlangmi Party Ṭuantlang Acozah: Tlangmi Party an ṭankhawm cun State ihsin Palai 207 neih thei mi lakah Palai 150 hrawng an neih ding ruangah NLD thawn ṭuantlang acozah an din thei. Tlangmipawl in President, NLD in State Councelor tivekin ṭuanvo an zemaw thei ding. Asilole NLD in President, Tlangmipawl in Speaker 1, Minister 8, State CM tivekin savo an zemaw thei. Hi hi duhthusam bik a si. Tlangmi le NLD lungrual hin Federal lam khal an zawh bik ding. Ralkap in a ṭihbik mi khal a si ding.

CNLD Flag

(c). Tlangmi Party Hoha Mi Acozah: Hi hi a cang thei mi a si. Tlangmi ṭuantlang party President Candidate cu PPP, USDP le ralkap khalin vote an pe thei. USDP hin NLD ai cun Tlangmi Candidate vote an pek a zumum sawn. Ralkap khalin cuti tho. Hivek hi 2014 Delhi UT hrilawknakah a rak thleng zo. Delhi Assembly tohkham 70 lakah INC 30, BJP 30, AAP 10 an hmu ih BJP le INC in AAP an sawm thei lo. Neta ahcun BJP bawm aiin tiah INC cun Palai 10 lawng nei AAP an bawm ruangah Arvind Kerejiwal cu CM a ṭuan ta a si. Hi hi ṭuantlangnak a si lo. INC in an ral bawm ai cun an ral khal si lo, an rual khal si lo an bawm tawp(Unconditional support)mai a si. Cun khat lamah NLD in amai hohanak thawn bawmtu a hmuh lo ahcun Tlangmi hohanak hnuai khalah a um thei thotho fawn.

(d) USDP Hoha Mi Acozah: USDP cu Palai 70 hrawng lawng nei dingah kan ruat a si kha. Ralkap Palai 166 thawn acozah an din thei hrih cuang lo ding. Palai 90 hrawng an mamawh mi hi NLD si lo, party dang tete hnen ihsin an lak thei cun acozah an din thei ve ding.

(e) USDP Tlangmi Party Ṭuantlang Acozah: Kan zumdan vek hrawng USDP in an ngah cun ralkap Palai thawn 231 hrawng an si ding. Tlangmi party in Palai 150 hrawng an rak neih cun ṭuantlang acozah an din thei ding. Khat lamin President, khat lamin State Counselor tivekin an zemaw thei ding.

Hi pawl hi kan ram politics ah a cang thei mi an si thluh. Asinan Ralkap cun President an ṭuan a zumum lem lo. An ṭuan pang ahcun NLD kan mawhthluk ding. A san cun mi huikhawm loih hngal takih an um ruangah a si ding. Hivek cang thei ding cun Tlangmi Party an cak le an pumkhatawknak a hnget a ṭul rori a si. NLD in amah lawngih acozah a din thei a si ahcun khipawl khi an ṭul lem lo ding. Asinan political expert pawl cun an zum lo.

Video ih zoh duh hrang: 


The Chin Times / Chin Net