The Chin Times hi na duhzawng a sile, in rak share sak vivo aw.

NLD Pawlin Thiamthu Rel Ding an Thei Lo Maw Si? – Pu Khuang Lian Sum

Kan ram hruaitu pawlih thilttha tuahmi cawimawi leh sunlawih nakthu rel dingah Ka dang a hnaanglo ih, An thilti diklo mi ngannak dingah Ka kut zungzik khal a thirlo.

Kan ram hruaitu pawlih thilttha tuahmi cawimawi leh sunlawih nakthu rel dingah Ka dang a hnaanglo ih, An thilti diklo mi ngannak dingah Ka kut zungzik khal a thirlo.

Kan hmuh vekin Kan U le nau pawlih Inn leh lo khua leh ram pawlcu NLD pawlin Ralpi khua bangin an siimih, rampi leh rampi do aw bangin JCB leh Tank pipi hmangin mai miphun pi U le nau thisen zawmpi pawlih Inn leh lo khua leh ram pawlcu hnawmpen leh meivaam ah an canter ta riai, Hi kan u le nau ttap rero pawlhin NLD hi an mah bawmtu leh kilhim tu dingih duhzet ih an hriltlin mi an rak si nan an mitthli luangter tu ah an cangta a sihi.

Si e,, Himi thuah Chin mipi leh NLD pawl ih thucuh awk micu Chin mipi cun NLD pawlin Inn leh lo khua leh ram an siatbal thluh hi thildik a silo, tihi Chin mipi ih dinnak cu a si. NLD pawlcun Cozah siannak um lo leh danlo ih khawdin mi a siih, Cozah sian nak umlo ih Inn sak mi a si, tihi NLD pawlih dinnak cu a si ve.

Aw le, NLD pawlhi Inn leh lo khua leh ram siatbal tu an si ruangah an siahbal mi khua leh ram Inn leh lo pawlhi Daanlo ih an dinnak thuhla an theimi fiangten Chin mipi hnen ah an sim fiangthei maw??

Cun an siahbal naksan ziang ruangah timi fiangten Chin mipi hnenah an sim ffiang thei maw? Himi thuah NLD pawlhin an thilti mihi a dik a si ah cun an diknak thu fiangten Chin mipi hnenah relfiang ngam haisehla,

An dik nak leh thiamthu relding an theilo a si ah cun Tlankual rero leh relh hlo nak hawl rero tumlo in Chin mipi hnenah Kan tisual a si in ngaithiam uh tiah ngaidam dil mai haiseh la Chin mipi thin na leh an ttahnak mithli luangtla a hul deuh mahna
Himi thuih NLD hotu pawl karlakih thusia puhawk nak leh thutha cuhawk nakih an buairuuk nak cun lamzinsuk lamtluang a pan vivo ih,

Himi thu ah reldan pali a um,
1, Nakah, Speaker Pu Zo Bawi in Bualpi khua a dinsuak ah cun Falam District ah minung Population an tam vivo dingih MP seat thum an nei theisal pangding ti a phan ruangah CM, Pu Lian Luai cu Bualpi khua siatbal dingin thu a pe ih CM Pu Lian Luai in Speaker Pu Zo Bawi ih thu a el ngamlo ruangah Bualpi khua hi a siatbal ter ti a si.

2, Nakah, Chin ram NLD hotu pawlin Pu Zung Hlei Thang leh Pu Ral Hnin cu 2020 hrilawk nakah Candidate Seat coter sal an duh nawnlo ih, Mi dangih thleng an duh ruangah Pu Ral Hnin ih bial mipi pawlin Pu Ral Hnin an duhlo nak Au Aw ansuah nak dingah Bualpi khua hi siahter a siih, himi Bualpi khua siahbal nak thuah a mah Pu Ral Hnin khal tuanvo pektel a si hngehnge ti a si,

3, Nakah . Bualpi khua hicu Cozah sianak umlo daanlo ih dinmi khua leh ram In leh lo a si ruangah NLD Cozah in Daan lo ih din micu Daan hmangih a siatbal a siko ti a si.

4, Nakah, Bualpi khua hi NLD Cozah ih siahbal mi a silo CM, Pu Lian Luai in Kawlpa tlawnnak ih pek a duh ruangah CM thuneih nak hmangih a siahbal mi a si ti a si.

Himi thuah Chin mipi maw diksawn? NLD pawlha diksawn? ticu Himi Cangan tu Kei Mi tlawmte cun ka theive loih, Himi Catlang tawite hin Kan Chin ram leh miphun Kilhim ih Tungding, Humhim, leh Cawisangtu dingah Zovek minung kan hriilding timi hi a nung Pathian duhdan rawn in ngaihtuah nak thinlungfim hmangtlang uhsi tihi ka lo sawm dunnak a si e,,

Lal nak tohkham sangah , Na ram zuar aw hlah.
Sumpai len leh tthat nakah, Na miphun zuar aw hlah.
Na ram duhdaw aw la, Na miphun humhim aw.
[ Suntha lo thlawhnuam uh le]

Hminsin: Himi thu hi Pu Khuang Lian Sum in amai’ Facebook cahmai ih a nganmi a si. The Chin Times cu ṭanbul neilo in bangran ten Ca kan post ṭheu. Kan mipi in thudik kan theih ngah ding kha kan tumtahmi a si ruangah, NLD lam in CNLD thu an nganmi siseh, CNLD lam in NLD thu an nganmi khal zobul ti umlo in kan tisuak ringring ding.