The Chin Times hi na duhzawng a sile, in rak share sak vivo aw.

Panglong Lungkimnak Thupuan (Panglong Agreement) – Chin Version

Panglong, 12 February 1947

Tonkhawmlairelnak pakhat cu Panglong ah tuah a si ih, Burmaram Acozahpi Executive Council ih sungtel hrekkhat, Saohpas zate le Shan States, Kachin Hills le Chin Hills ihsin palaipawl an kai:

Tonkhawmlairelnak ih sungtelpawl cun Shan, Kachin le Chinmipawl hin alangte ih dinmi Burmaram Acozah thawn ṭanrualnak hmakhatte ih an neih a si ahcun zalennak hi zamrang deuh ih ngah a theih ding ti zumnak an nei:

  1. Tlangpar Minung Pawlkom Supreme Council (SCOUHP) palaipawl ih ruahnak peknak thawn Governor ih a hrilmi Tlangpar Minungpawl ih Palai pakhat cu Counsellor ṭunvo pek a si ding. Ziangahtile Tlangpar Rampawl khal ahleice ih thuneihnak pek an si ve pei.
  2. Himi Counsellor cu Governor thuhnuai ih um Executive Council khalah kaihmi ṭuanvo ngaingai neiloin Sungel ṭuanvo pek a si pei. Cun, Humhual le Ramleng Pehtlaihnak thuhla thawn apehtlaiawmi Tlangpar Rampawl ih thuhla cu Constitutional Convention hin Executive Council ih lairelnak hnuaiah a ret pei. Tlangpar Rampawl ai-awhtu Counsellor cu ahleice ih thuneihnak pek a si ve pei.
  3. A parlamih sim zomi Counsellor cu amai phunhnam siloin, phunhnam dangpawl ai a awhtu Deputy Counselor pahnih in an bawm pei. Hi Deputy Counsellor pahnih cun anmai ram cio ih thuhlapawl cu co-u pekin an tawlrel pei ih Counsellor cun a dang Tlangpar Rampawl ih thuhlapawl cu a tawlrel pei. Asinan hipawl hin Constitutional Convention ih simmi vekin komkhawm ṭuanvo kan nei timi lungput thawn hna an ṭuantlang pei.
  4. Council ih Tlangpar Rampawl hrang lairelnak thu-ah Executive Council ih Sungtel dinhmun in palai a ṭuantu ding cu himi Counsellor lawng a si pei ih Council ah Tlangpar Rampawl thuhla relkhawm a si caan ah Deputy Counsellors pawl khal an tel thei ve pei.
  5. Governor ih Executive Council cu a tlunlamih lungkimmi vekin mipum tamter a si. Asinan Tlangpar Rampawl in mah le mah uk awknak hrangih an hman rero zomi an thuneihnakpawl siatsuah ding zawng cun Executive Council cun hna a ṭuan lo pei. Tlangpar Rampawl hin mah le mah ukawknak hrangah pumhlum zalennak an nei ti cu a thu cun lungkim a si.
  6. Akomkhawm-awmi Burmaram sung thotho ah Kachin Ram ramrikhiah ding le dinsuah ding thu cu Constituent Assembly ah relcat ding a si. Tuvek ih Ram pakhat dinsuah ding cu a duh um zet. Hivek ih thil cangsuak thei dingah 1935 Kawlram Acocah Daan sungih a um vekin, Myitkyina le Bhamo ramṭhenpawl siseh, Ṭhen 2nak, Ahleice Ramṭhen timipawl siseh ukawkdaan thu-ah Tlangpar Rampawl hrang ṭuanvo neitu Counsellor le Deputy Counsellor pawl cu thuron an si pei.
  7. Tlangpar Rampawl ih a umtu rammipawl cun democracy rampawl ah thupi zetih an ruahmi covo le sinak dangdangpawl cu an congah pei.
  8. Himi Lungkimnak thupuan sungih nganmi thuhlapawl cu federal dinhmun a ngahtu Shan Ram ih sumdawnnak zalennak thuhla thawn akalhaw lo pei.
  9. Himi Lungkimnak thupuan sungih nganmi thuhlapawl cu Kachin Hills le Union Hills pawlin Burmaram ngunkhuai sung ihsin an congah dingmi sumpai bomnak thuhlapawl thawn akalhaw lo pei. Burmaram le federal dinhmun a ngahtu Shan Rampawl ih neihmi thawn abangrepmi sumpai thuhla tawlrelnak cu Kachin Hills le Chin Hills pawl hrang khalah hman ding aremcang maw remcang lo timi thu cu Executive Council in Tlangpar Rampawl hrang ṭuanvo neitu Counsellor le Deputy Counsellor pawl thawn a zohkhawm pei.

Himi Panglong Lungkimnak Thutiam ih hminkhentu pawl;

Kawlram Acozah.

(Hminkhen) Aung San

Kachin Committee.

(Hminkhen) Sinwa Naw, Myitkyina

(Hminkhen) Zaurip, Myitkyina

(Hminkhen) Dinra Tang, Myitkyina

(Hminkhen) Zau La, Bhamo

(Hminkhen) Zau Lawn, Bhamo

(Hminkhen) Labang Grong, Bhamo

Chin Committee

(Hminkhen) Pu Hlur Hmung, Falam

(Hminkhen) Pu Thawng Za Khup, Tiddim

(Hminkhen) Pu Kio Mang, Haka

Shan Committee

(Hminkhen) Tawngpeng State ihsin Saohpalong.

(Hminkhen) Yawnghwe State ihsin Saohpalong.

(Hminkhen) North Hsenwi State ihsin Saohpalong.

(Hminkhen) Laihka State ihsin Saohpalong.

(Hminkhen) Mong Pawn State ihsin Saohpalong.

(Hminkhen) Hsamonghkam State ihsin Saohpalong.

(Hminkhen) Hsahtung Saohpalong ihsin Palai Hkun Pung

(Hminkhen) U Tin E

(Hminthuut) U Htun Myint

(Hminkhen) U Kya Bu

(Hminkhen) Hkun Saw

(Hminkhen) Sao Yape Hpa

(Hminkhen) Hkun Htee

Chin version ih tawlreltu Michael Vanbawizul, The Chin Times / Chin Net

Translated into Chin by Henry (Lairam Vapual)

PDF File ih download duh hrang: Panglong Lungkimnak Thupuan – Chin Version

Video in zoh duh hrang;

The Chin Times / Chin Net