The Chin Times hi na duhzawng a sile, in rak share sak vivo aw.

Ramhrin Miphun Pakhat Dinhmun in 2020 Rampi Hrilawknak Thlirnak (Part 1)

Ram Mipi zate deuhthaw in Ralkap uknak ihsin zalennak kan ngah theinak dingih kan beiseinak sangbik kan tthumnak, Daw Aung San Suh Kyi ih hohami NLD Party cun 2012 Lailak hrilawknak

๐‘๐š๐ฆ๐ก๐ซ๐ข๐ง ๐Œ๐ข๐ฉ๐ก๐ฎ๐ง ๐ฉ๐š๐ค๐ก๐š๐ญ ๐ƒ๐ข๐ง๐ก๐ฆ๐ฎ๐ง ๐ข๐ง ๐Ÿ๐ŸŽ๐Ÿ๐ŸŽ ๐‘๐š๐ฆ๐ฉ๐ข ๐‡๐ซ๐ข๐ฅ๐š๐ฐ๐ค๐ง๐š๐ค ๐“๐ก๐ฅ๐ข๐ซ๐ง๐š๐ค (๐๐š๐ซ๐ญ ๐ˆ)

๐—ฅ๐—ฎ๐—บ๐—ธ๐˜‚๐—น๐—ต (๐—ฆ๐˜๐—ฎ๐˜๐—ฒ) ๐—ฝ๐—ฎ๐˜„๐—น ๐—ฎ๐—ต ๐—ฅ๐—ฎ๐—บ๐—ต๐—ฟ๐—ถ๐—ป ๐— ๐—ถ๐—ฝ๐—ต๐˜‚๐—ป (๐—ง๐—น๐—ฎ๐—ป๐—ด๐—บ๐—ถ) ๐—ฃ๐—ฎ๐—ฟ๐˜๐˜† ๐˜๐—ฒ๐—ป๐—ด๐˜๐—ฒ๐—ป๐—ด ๐—ฎ ๐˜๐˜๐˜‚๐—น ๐—บ๐—ฎ๐˜„?

[๐˜’๐˜ถ๐˜ฎ 5 ๐˜ด๐˜ถ๐˜ฏ๐˜จ๐˜ข๐˜ฉ ๐˜ค๐˜ข ๐˜ด๐˜ข๐˜ถ ๐˜ฅ๐˜ฆ๐˜ถ๐˜ฉ ๐˜ฏ๐˜ข ๐˜ด๐˜ช๐˜ข๐˜ณ ๐˜ฑ๐˜ข๐˜ช๐˜ฉ ๐˜ญ๐˜ฐ๐˜ช๐˜ฉ ๐˜ฏ๐˜ข ๐˜ด๐˜ช๐˜ข๐˜ณ ๐˜ฅ๐˜ข๐˜ฉ ๐˜ญ๐˜ฆ๐˜ฎ๐˜ญ๐˜ฐ ๐˜ฉ๐˜ฎ๐˜ข๐˜ฏ๐˜ข๐˜ฉ, ๐˜™๐˜ข๐˜ฎ๐˜ฉ๐˜ณ๐˜ช๐˜ฏ ๐˜”๐˜ช๐˜ฑ๐˜ฉ๐˜ถ๐˜ฏ ๐˜ฑ๐˜ข๐˜ฌ๐˜ฉ๐˜ข๐˜ต (๐˜›๐˜ข๐˜ช๐˜ฏ๐˜จ๐˜บ๐˜ช๐˜ฏ๐˜ต๐˜ข) ๐˜ฏ๐˜ข ๐˜ด๐˜ช๐˜ฏ๐˜ข๐˜ฌ ๐˜ช๐˜ฏ, ๐˜ฉ๐˜ช ๐˜ค๐˜ข ๐˜ค๐˜ถ ๐˜ด๐˜ช๐˜ข๐˜ณ ๐˜ต๐˜ต๐˜ฉ๐˜ฆ๐˜ฉ ๐˜ต๐˜ฆ๐˜ฏ๐˜จ๐˜ต๐˜ฆ๐˜ฏ๐˜จ ๐˜ฅ๐˜ช๐˜ฏ๐˜จ๐˜ข๐˜ฉ ๐˜ฌ๐˜ข ๐˜ญ๐˜ฐ ๐˜ด๐˜ข๐˜ธ๐˜ฎ. ๐˜๐˜ฐ๐˜ช๐˜ฌ๐˜ฉ๐˜ข๐˜ต ๐˜ด๐˜ช๐˜ข๐˜ณ๐˜ช๐˜ฉ ๐˜ฏ๐˜ข ๐˜ด๐˜ช๐˜ข๐˜ณ ๐˜ต๐˜ต๐˜ฉ๐˜ฆ๐˜ฉ ๐˜ฑ๐˜ข๐˜ช๐˜ฉ ๐˜ญ๐˜ฐ ๐˜ฉ๐˜ฎ๐˜ข๐˜ฏ๐˜ข๐˜ฉ ๐˜ด๐˜ฉ๐˜ข๐˜ณ๐˜ฆ ๐˜ข๐˜ธ๐˜ญ๐˜ข (๐˜ฐ๐˜ฏ๐˜ญ๐˜บ ๐˜ฎ๐˜ฆ ๐˜ช๐˜ฏ ๐˜ด๐˜ช๐˜ฎ๐˜ข๐˜ธ), ๐˜ค๐˜ถ๐˜ญ๐˜ฆ ๐˜ฏ๐˜ข ๐˜ด๐˜ช๐˜ข๐˜ณ ๐˜ต๐˜ต๐˜ฉ๐˜ฆ๐˜ฉ๐˜ช๐˜ฏ ๐˜ฏ๐˜ข ๐˜ฅ๐˜ถ๐˜ฉ ๐˜ญ๐˜ฆ ๐˜ฏ๐˜ข ๐˜ฅ๐˜ฆ๐˜ญ๐˜ฆ๐˜ต๐˜ฆ ๐˜ด๐˜ข๐˜ญ ๐˜ฅ๐˜ช๐˜ฏ๐˜จ.]

Tulai cu amah le a caante a si vekin kan kiangkap khui khalah 2020 Myanmar Rampi Hrilawknak thu le Covid-19 thu in hmun a luah khat: Social Media ah siseh, a leng tonawk caanih titi thunuam-relnak ah siseh, thudang hnakin hi thu hnih hi kan rel celcel bikmi le kan thawtbikmi a si ding a bang.

Covid-19 cu siibawi pawl le mithiam ttuanvo neitu pawl ih thlun ding an timi daan pawl thlunin, an sim vekih ralrin le kimhim awk ding a va si mei ko ih, kannih pawl ih rak rel ve ciamco ding a um lemlo tikah 2020 Rampi Hrilawknak ding thu sawn vun rel ve kan tum ding.

Rampi Hrilawknak hi 2008 Daan Hrampi nemhnget hnu ih ttum 3-nak tla a si thlang tikah, hmaisa ttum 2 hnak cun zaran Mipi in Hrilawknak umtudan kan fiang vivo mi hi a lungawi um ngaingai. Kan rel tummi thupi lam sawnah lut cih mei sehla…

Ram Mipi zate deuhthaw in Ralkap uknak ihsin zalennak kan ngah theinak dingih kan beiseinak sangbik kan tthumnak, Daw Aung San Suh Kyi ih hohami NLD Party cun 2012 Lailak hrilawknak (By-election) ih Hmunlawng hrekkhat ah, le 2015 Rampi Hrilawknak ah “Thlengawk a Cu Zo” timi Thupi hmangin, thungai thlakih an ra zuam tikah, mah le Ramhrin Miphun Tualto Party pawl hman Vote pe nawn loin, NLD ah kan Vote zaten kan rak bur ttheh. Ram mipi zaten lungrualtei’ kan vote hmunkhat ih kan thlakkhawm zarah, NLD Party cun Pyituh Hluttaw ah Seat 255 le Amyotha Hluttaw ah Seat 135 ngahin, Assembly of the Union (Pyidaungsu Hluttaw) ih Seat 664 ummi ah Seat 390 a ngahih, Party dang sawm ttul riai loin amah te’n Central Acozahpi a dinsuak thei.

๐—ก๐—Ÿ๐—— ๐—ฃ๐—ฎ๐—ฟ๐˜๐˜† ๐—น๐—ฒ ๐—ฅ๐—ฎ๐—บ๐—ต๐—ฟ๐—ถ๐—ป ๐— ๐—ถ๐—ฝ๐—ต๐˜‚๐—ป
NLD Party hi dinglai Acozah a si vekin Ramhrin Miphun thu vun rel ding khalah NLD telh lo a theih lo. September 10, 2020 ih Mizzima Thuthang in Central NLD Committee Vice President, Dr. Zaw Myint Maung (Mandalay CM) interview an tuahmi ah Ramhrin Miphun Party vote pek ruangah Ramhrin Miphun Covo ngah phah ding timi hi a dik lo thu, le NLD kuthnuai (let-auh-khan) ihsin Ramhrin Miphun Covo lak ngah thei timi hi an theithiam vivo tiin a rak rel. NLD Central in Ramhrin Miphun hruaitu pawl le Ramhrin Miphun pawl hi an hnuai ih an um thu le anmah dil cop a ttul thu a rel tumbikmi a si.

Mipum malte lawng a ummi Miphun hrang ahcun Democracy lawngin a ngah lo ti cu kan zateโ€™n kan fiang cio ko ding. Curuangah anmah NLD lala khalin Democracy Federal system hmang dingin tlang an au phahphah rero. Asinan, Federal timi ih a sung-muril ngaingai cu maiโ€™ hmakhua mahteiโ€™ sial, mahteiโ€™ Lairel thei ti a si tikah, Centralization (tlunlam ihsin uk) uar tuktu cun an kuthnuai ih a ummi pawl hnen hmanah thuneihnak sangtuk pek an duh lo ti cu kum 4 lenglo in uknak ihsin kan hmufiang cio ko ding. Thuneihnak an ngah hnu ih an cangvaihdan pawl tarlang sehla:

(๐™–) ๐™ˆ๐™ฎ๐™–๐™ฃ๐™ข๐™–๐™ง ๐˜พ๐™ค๐™ฃ๐™จ๐™ฉ๐™ž๐™ฉ๐™ช๐™ฉ๐™ž๐™ค๐™ฃ (2008) ๐™ž๐™ ๐˜ผ๐™ง๐™ฉ๐™ž๐™˜๐™ก๐™š 261 ๐™๐™š๐™ข ๐˜ผ๐™ฃ ๐˜ฟ๐™ช๐™ ๐™ก๐™ค
Myanmar Daan Hrampi (2008) Article 261 cu State le Region pawl ah President ih duhnak vek sawn in Chief Minister hril ding a si thu a si. Himi rem dingin USDP in Hluttaw ah thu an rak thun nan Hluttaw ih hmun tam sawn a latu NLD in an vuak thlak sak! Federal a duh ngaingai tu cun mahteiโ€™ lairel theinak hrang a poimawh bikmi pakhat rem hi a duh tengteng ding a si. Asinan, annih cun Article 59(f) rem thei ding an ngai thupi sawn.

(๐™—) ๐™Ž๐™ฉ๐™–๐™ฉ๐™š ๐™ก๐™š ๐™๐™š๐™œ๐™ž๐™ค๐™ฃ ๐˜ผ๐™˜๐™ค๐™ฏ๐™–๐™ ๐™๐™ฃ๐™š๐™ฃ๐™–๐™ ๐™๐™๐™ช๐™ฃ๐™š๐™ž๐™๐™ฃ๐™–๐™  ๐˜ผ๐™ฃ ๐™‹๐™š ๐™ˆ๐™–๐™ก ๐™๐™ช๐™ 
Dinglai Acozah hin Daan Hrampi ih a kham lomi pawl ah tuah theimi tampi an nei. State lole Region pakhat hnenah thu neihnak (an thilti-theinak) hlawm โ€œpower sharingโ€ a theih tuk. Asinan, tu ahcun thuneitubik asimi CM hman duhduh in an uk, an khawng thei. Curuangah anmaiโ€™ duhmi CM retin, duhduh ih cangvaih hrih an duh ruangah a parih kan tarlangmi Article 261 an rem duh lonak khal a si ding. Daan hrampi ih a kham lomi thil tampi ah State le Region Acozah thuneihnak a ngah lomi a tam tuk. Power-sharing (Thuneihnak ttawmawk) thu ah Union Minister pawl le Union Government ih a sian lawngah hnattuan thei an si. Ramhrin Miphun pawl hrang a ttul hleice mi kan covo pawl a simi: Fimzirnak thu ah siseh, Harhdamnak thu ah siseh, Thansohnak hrang thil ttulmi ziangtinkim ah a tuah theimi a mal tuk. State lole Region Acozah in Budget management a tuah theimi zat (amount) khal a mal tuk lai.

(๐™˜) ๐™๐™–๐™ข๐™๐™ง๐™ž๐™ฃ ๐™ˆ๐™ž๐™ฅ๐™๐™ช๐™ฃ ๐™‹๐™–๐™ง๐™ฉ๐™ฎ ๐™–๐™ฃ ๐™‰๐™œ๐™–๐™ž ๐™‹๐™ค๐™ž๐™ข๐™–๐™ฌ๐™ ๐™‡๐™ค
Ramhrin Miphun thu Lairelnak tumbik a simi, Union Peace Conference – 21st Century Panglong rori hmanah nehnak a co lomi Ramhrin Miphun Party pawl tel an siang lo tikah, mah Miphun hruaitu pawl an tel thei nawn lo. NLD ihsin a tlingmi Ramhrin Miphun Palai pawl asile tlunlam mithmai zoh dekdo a ttul ringring tikah ralttha takin zianghman an rel ngam lo.
Ramkulh ih Seat tam sawn a ngahtu Rakhaing (Arakan) ah Chief Minister cu Arakan National Party mi pe duh loin anmah seat mal sawn cotu NLD in an lak. Curuangah buainak a phunphun a suah phahih ANP Hotu, Dr. Aye Maung tiang thawng an thlak phah. AA pawl hi tlukih an sosang le an puakkuainak khal himi ruang deuhbik ah a si.

๐™™) ๐™ˆ๐™ž๐™ฅ๐™๐™ช๐™ฃ ๐™ฉ๐™ช๐™ข๐™ฅ๐™ž ๐™‹๐™–๐™ ๐™๐™–๐™ฉ ๐™จ๐™ž ๐™ฉ๐™๐™š๐™ž ๐™™๐™ž๐™ฃ๐™œ๐™ž๐™ฃ ๐™ƒ๐™ข๐™– ๐™–๐™ฃ ๐™Ž๐™ž๐™–๐™ก
1947 February ih tuahmi Panglong Conference le lungkim tlangnak ruangih ram pakhat a si fangmi Myanmar ram ah, Miphun pakhat vekih um dingin hma an la rero. Ramhrin Miphun pawl duhnak ngai poimawh loin,Mon Ramkulh Thanlwin Chaungsone Lilawn hmin cu Bogyoke hminah an thleng. Cun, Boyoke Aung San zuklem cu Ramkulh Khawpi pawl a simi: Loikaw (Kaya/Kareni), Myitkyina (Kachin), Mudone (Mon), Hakha le Thantlang (Chin) pawl ah ret an tum, le an ret ruangah buainak nasa tak a suak. Curuangah Bogyoke Aung San ih Panglong Thutiam pawl hnakin amah Bogyoke Aung San ngaina tu an si ti a fiang. Cuiโ€™ hleiah, Karen Ramkulh ah Karen Dothlenghnak rak tuahtu Sawba U Kyi ih zuklem tuah an tummi cu NLD Acozah in an siang lo, buainak nasa tak khal a suah phah. A ruhlang ih kan rel asile an hotu pawl hi Burmanization cangvaitu an si ti a theih.

๐—ฅ๐—ฎ๐—บ๐—ต๐—ฟ๐—ถ๐—ป ๐— ๐—ถ๐—ฝ๐—ต๐˜‚๐—ป ๐—ฝ๐—ฎ๐˜„๐—น ๐——๐—ถ๐—ป๐—ต๐—บ๐˜‚๐—ป ๐—ญ๐—ถ๐—ฎ๐—ป๐—ด๐˜ƒ๐—ฒ๐—ธ ๐—ฎ ๐˜€๐—ถ?
2020 Myanmar Rampi Hrilawknak ah Ramhrin Miphun Party pawl in ziangtluk tiang dinhmun le covo an nei timi vun zohkhawm sehla…

(๐™–) ๐™Ž๐™ฉ๐™–๐™ฉ๐™š ๐™ก๐™š ๐™๐™š๐™œ๐™ž๐™ค๐™ฃ ๐™ƒ๐™ก๐™ช๐™ฉ๐™ฉ๐™–๐™ฌ
State Hluttaw (State Assembly) le Region Hluttaw (Region Assembly) cu rel ciamco a ttul lo ding: Ziangahtile Hluttaw ih 25% cu Ralkap in hmun an lak zo tikah hril dingmi cu 75% lawng a si. Cuiโ€™ 75% ih Percengate sungin kan zoh sal asile hrilawknak zate ih 67% tlun a ngahtu lawngin Hluttaw seat zate ih 51% a si dingih, cutin State lole Region Acozah an din thei ding. Curuangah kanmah Ramhrin miphun kan hril ahcun Ramhrin Miphun in Acozah a din thei tinak a si ko.
Cun, Rampumhuap State le Region pawl ahhin Ministers of Ethnic Affairs mi 29 an um. Umnak hmun (State/Region) Mipum zate komih 0.1% a ummi Miphun in hi Ethnic Affairs Minister hi an hril theiih, annih pawl cu State lole Region Acozah ah le Hluttaw ah an tel cih.
Chin Miphun cun Ethnic Affairs Minister 3 kan nei: Sagaing, Magway le Rakhine pawl ah Chin Affairs Minister tiin an um. Chin State ahcun Miphun dang ih Ethnic Affairs Minister an um lo.

(๐™—) ๐™‹๐™ฎ๐™ž๐™™๐™–๐™ช๐™ฃ๐™œ๐™จ๐™ช ๐™ƒ๐™ก๐™ช๐™ฉ๐™ฉ๐™–๐™ฌ
Assembly of the Union (Pyidaungsu Hluttaw) timi cu Seat 224 (Hrilmi: 168 le Ralkap: 56) a ummi, Amyotha Hluttaw (House of Nationalities/Upper House) le Seat 440 (Hrilmi: 330 le Ralkap: 110) a ummi, Pyithu Hluttaw (House of Representatives/Lower House) pahnih komkhawmmi a siih, zate komin Hluttaw Palai 664 an um.
Amyotha Hluttaw cu State le Region bangrep ih 12 cio hril an si ruangah State pawl ihsin mi 84 a si tikah, Rampumhuap Amyotha Hluttaw hril dingmi 168 ih 50% a si.
Cun, State pawl ihsin Pyituh Hluttaw Palai hril ding zat cu Kachin โ€“ 18, Kaya (Kareni) โ€“ 7, Kayin โ€“ 7, Chin โ€“ 9, Mon โ€“ 10, Rakhine (Arakan) โ€“ 17, Shan โ€“ 55 tiin, State 7 ihsin Seat 123 a um ruangah 2020 Rampi Hrilawknak ih hril dingmi Pyituh Hluttaw 330 ih 37.3% a si.

Himi dinhmun hi Ramhrin Miphun pawl in covo kan neih tikah, mah le State tinah Ramhrin Miphun Party pawl an tlin asile ziangvek Party pi hmanin Ramhrin Miphun Party sawm loin, State lole Region Acozah siseh, Central Acozah siseh an din thei hrimhrim lo ding.
2015 Rampi Hrilawknak ahcun NLD Party in Pyidaungsu Hluttaw Seat 664 ih 58% a simi, Seat 390 (Amyotha Hluttaw – 135 le Pyituh Hluttaw โ€“ 255) an ngah tikah, President hrilnak hrangih a ttulmi Seat 333 hnakih tam an ngah ruangah, Central Acozah an rak din theinak a si.

๐—ฅ๐—ฎ๐—บ๐—ต๐—ฟ๐—ถ๐—ป ๐— ๐—ถ๐—ฝ๐—ต๐˜‚๐—ป ๐—ฃ๐—ฎ๐—ฟ๐˜๐˜† ๐—ฝ๐—ฎ๐˜„๐—น ๐—ญ๐—ถ๐—ฎ๐—ป๐—ด๐˜๐—น๐˜‚๐—ธ ๐—ถ๐—ป ๐—”๐—ป ๐—ฃ๐—ผ๐—ถ๐—บ๐—ฎ๐˜„๐—ต?
Ramhrin Miphun Party pawl cun thuhmun pakhat nei-in, maiโ€™ khua le ram ah mahte ih Lairel theinak (Federal) an buaipi cio tikah, Party dangdang vek va si hman sehla ttangrual le ttangtlang dingin lungkimnak tampi an nei hai. An huatbikmi tlunlam ihsi uknak a khoh tukmi (Centralization) ihsin mahteiโ€™ awmtawk Lairel theinak (Decentralization) le Federal cangsuak thei dingah nasa takin hma an lak theinak dingah, mah le State tinah Ramhrin Miphun pawl in nehnak an co a ttul. Cumi lawngah tlunlam mithmai zoh lia-lo ttul loin, maiโ€™ Miphun le Ramkulh (State) covo cio hrang nasa takin an au thei ding. Maiโ€™ khua le ram laireltu ding ahcun mah miphun rori hi a fuhbik ko.

Ramhrin Miphun Party pawl in mah le Ramkulh cio ah a tlunih kan tarlangmi vekin nehnak kan co a si ahcun Ramhrin Miphun Pary pawl tel loin ziangvek Party pi (Rampumhuap Party) pawl hmanin Central Acozah an din thei lo ding. Cutikah, Ramhrin Miphun Party komkhawm in lungrual teโ€™n awkhat suahin, โ€œkan Ramkulh ah kanmah Chief Minister in pe uh, Union Minister hmun ziat in pek a ttul, himi pawl nan lungkim lawngah in ra kom thei ding,โ€ tiin kan ti thei ding. Himi pawl hi kan duhmi Komkhawm Acozah ih a hrampibik a si vekin, Party kim Democracy System ih hmun co ngah lomi Ramhrin Miphun pawl an thupitnak ding lamzin umsun khal a si.

Curuangah Ramkulh pawl ah Ramhrin Miphun Party pawl in nehnak co in, Acozah Control theitu Thazaang kan neih lawngah, kan rel rero zo vekin tlunlam mithmai zoh dekdo ttul loin, kan covo a simi: Leiram, Ramri, Khursung suak lungmankhung pawl, Sakhuanak, Nunphung le Calai thu pawl ah ralttha takin kan au ngam dingih, kan sun zomi le kan sun reromi covo pawl la salin, nekrawkmi dinhmun ihsin kan suak thei ding.

Aw… cule, Chin miphun ih kan Ramhrin Miphun Party (in huapkau tubik) cu CNLD hi a si.

Ramhrin Miphun Party pawl Dinpitu,
Salai Van Thawng Thang