The Chin Times hi na duhzawng a sile, in rak share sak vivo aw.

Tufang Malaysia ram ih Rakhine le Laimi karlak thubuai ah Rakhine Community in thusuah an tuah

Mi tamsawn in kan theih thluh zo bangin, tufang ah Malaysia ram ih um Rakhine mino pawl le Laimi ṭhenkhat pawl karlak ah hroawknak nasa tak a suak. Miphun hmin sal ih an tiawk tikah khat lam khat lam in tuar a na ih tuvekin boruak a sosan vivonak a si.

Hi thu thawn pehpar in Malaysia ram ih um mi Arakan Refugee Relief Committee (ARRC) cun thusuah an tuah a si. Hivek thuhla buai a ummi parah Chin le Rakhine kan pehtlai awknak a siatsuah lo ding khal an tarlang cih. Tuihlan ihsin Rakhine ram sungah Chin miphun tla an um ve, cuvekin Chin ramsung khalah Rakhine miphun an um ve, khat le khat karlak ah buainak a suak lo, tiah an ngan.

Kap hnih lam in sualnak a tuah hmaisa biktupawl hi ARRC le ACR kawmkhawm in a zamrang lam in kaih ngah an si thei lohlinak dingin le, leh hnu lam ah zo miphun ti umlo, hivekin khat le khat ral awknak, huatawknak suakter tu ṭawngkam siseh, Video khal siseh thehdarh nawn lo dingin dilnak khal an ngan tel cih.

ARRC ih Thusuahmi

Thu umdan cu hitin a si, March thla sung ah khan Hakha Chin a ti-awtu pawl in Rakhine pa cu an thawi ih a kutzung tla nam thawn an sat sak. Cui’ tlunah a zahmawh tla an aat sak. Rakhine miphun ngiarnak ṭawngkam khal Video sungah theih theih in a um cih. Cutin boruak a sosang vivo ih Online ihsin khat lam khat lam in hro an suang ciamco.

Mizan (April 3, 2020) ah khan Video file thar a suak lala ih tuiṭum cu, Rakhine pawlin Chin pa an velhnak a si. Video file zoh tikah an velhmi a bese zet. Hivekin boruak a so sang vivo a si ahcun thil pawi zet ding a si. Video file pawl cu Online ah thehdar zelzel a si nan, Malaysia ram ih Community hotu lam thusuah vekin The Chin Times website le Group ahcun kan tarlang ve lonak a si.