The Chin Times hi na duhzawng a sile, in rak share sak vivo aw.

“Ziang khaw theilo mino rual” Timi Ṭawngkam Hi – Michael Van

Tufang cu zo poh khalih buaipi a si vekin a tikcu can laifang a si ih ka hmuhdan tete run ngan ve hnik sehla..

Tufang kan Chinram dinhmun kan thlir asile, Campaign tuah rero laifang a si ih, Party hotupawl bialfang in thu tintian, an tuah thei dingmi siseh, an tuah theilo ding tiang khal mipi hnen ih thu an kam ciamco laifang a si.

Himi zawn ah NLD hotu an va si ah, CNLD hotu an va si ah, an ṭawngkam theihmi tete lak ihsin ka hnak i doh zettu pakhat a um. Cucu “Ziang khaw theilo Mino rual” timi hi a si.

Party hohatu upa pakhat ve in “Ziang khaw theilo mino rual” asilole, “Mino rual thisen sa cu an phur hluthlo ih an reh leh mei ding” tivek tete ṭawngkam hi Mino ziangih siarlonak ṭawngkam a si tiin ka ruat.

Mino cu khawruahnak virvat, mi zuanzang ṭha, mifim, cathiam an si. “Ziang khaw theilo mino rual” tivek ih ti ding men a si lo. Digital san a si zo, kan mino tete pawl ziangtluk an filawr zo, sia le ṭha an thei thluh zo. Duh hril theinak an nei, nauhak aa an si nawn lo. Cui’ an duh hrilmi lamzin ih an fehnak ah “Ziang khaw theilo mino rual” vun ti men ding cu a ṭha lo zetmi a si.

Tufang ah kan Chinram dinhmun cu zokhal ih kan theih thluhmi a si ih, Mino rual in ziang Party Policy zoh in, ziang party an ṭan timi an theifiang tuk. Party pakhat khat ih fehpimi Policy an theih ruangih an ṭan le an dinpinak ah mawhthluk thei kan si lo. Khai ziang khaw theilo mino rual ti thei kan si lo.

“NLD lam hotu in thu an sim, CNLD lam hotu in thu an sim, Party pahnih veve in thu an sim ih, Mino cun khuimi deuh kan zum ding, khuimi deuh kan thlun le a ṭha ding timi thusia thuṭha cu an ruat thei tuk lawlaw. Kan thusim mi an thlun lo ih in dinpi lo ruangah “Ziang khaw theilo mino rual” timi ṭawngkam hi hmang lo sehla.

“Ziang khaw theilo mino rual” timi ai ah “Hmai lam can ih in hruaitu ding kan mifim le mi thiam, Mino rual” tihi kei cun ṭha ka tidan zawng a si.

Himi thu hi Micael Van in a facebook cahmai ih a post mi kan post sawngmi a si.